«Ելք» դաշինքը Կենտրոնական ընտրական հանձնաժողով դիմում է ներկայացրել՝ պահանջելով դատարան դիմել Երեւանի ավագանու ընտրություններին մասնակցող սուբյեկտներից մեկի՝ Հայաստանի Հանրապետական կուսակցության գրանցումը ուժը կորցրած ճանաչելու մասին: Մայիսի 12-ին՝ ԿԸՀ-ում լրագրողների հետ զրույցում այս մասին հայտարարեց 6-րդ գումարման ԱԺ նորընտիր պատգամավոր, իրավապաշտպան Արտակ Զեյնալյանը
Նրա խոսքով՝ դաշինքի դիմումը հիմնված է այն փաստի վրա, որ երեկ շտաբներից մեկում բացահայտվել է ընտրակաշառք բաժանելու եւ քվեաթերթիկ տրամադրելու դեպք: «Քվեաթերթիկները միայն վաղը կտրամադրվեն տեղամասային ընտրական հանձնաժողովներին, սակայն արդեն երեկ քվեաթերթիկ է շրջանառվել»,- ընդգծեց Արտակ Զեյնալյանը:
Ըստ իրավապաշտպանի՝ ներկայացված դիմումը չի կարող այսօրվանից ավելի ուշ քննարկվել: Մենք ԿԸՀ-ից պահանջել ենք երաշխավորել ու ապահովել դատական պարզաբանման մեր իրավունքը եւ մեր դիմումի հետ կապված վերջնական որոշումը ներկայացնել ժամը 15:00-ից ոչ ուշ, որպեսզի կարողանանք Վարչական դատարան հայց ներկայացնել: Բոլորս վստահ ենք, որ ԿԸՀ-ն իրավական պաշտպանության արդյունավետ համակարգ չէ: Հետեւաբար՝ մենք ամեն դեպքում դատարան կդիմենք, եթե ԿԸՀ-ն մինչեւ ժամը 14:00 նիստ չհրավիրի»,- հավելեց Արտակ Զեյնալյանը:
