Մալաթիա Սեբաստիա վարչական շրջանի Կուրղինյան նրբանցքում գտնվող Տարոն Մարգարյանի նախընտրական շտաբի մոտ քաշքշուկ է տեղի ունեցել քաղաքապետի թեկնածու Նիկոլ Փաշինյանի, «Ելք» դաշինքի անդամների եւ ոստիկանների միջեւ: «Ելք» դաշինքի անդամ Նիկոլայ Բաղդասարյանի ֆեյսբուքյան էջում տեղադրված տեսանյութից տեղեկանում ենք, որ ոստիկաններն արգելել են Նիկոլ Փաշինյանին մուտք գործել Տարոն Մարգարյանի շտաբ, որտեղ զննություն է կատարվում: «Ելք» դաշինքի ներկայացուցչի պնդմամբ՝ ոստիկանների ներկայությամբ շտաբից փաստաթղթեր են հանվել:
Նշենք, որ Տարոն Մարգարյանի նախընտրական շտաբն այս պահին հսկում են մեծ թվով ոստիկաններ, այնտեղ են նաեւ «Ելք» դաշինքի անդամները:
Ավելի վաղ տեղեկացրել էինք, որ մայիսի 11-ի լույս 12-ի գիշերը քաղաքապետի թեկնածու Նիկոլ Փաշինյանն եւ «Ելք» դաշինքի անդմաները Արարատյան զանգվածի Կուրղինյան փողոցում գտնվող Տարոն Մարգարյանի նախընտրական շտաբի մոտ պահանջել են բացել շտաբի դուռը, քանի որ, ըստ նրանց, այնտեղ կան քվեաթերթիկներ, փող եւ ընտրողների ցուցակներ: Ավելի վաղ այդ շտաբում հարձակման էր ենթարկվել, երբ տեսանկարահանելիս է եղել շտաբում կաշառք բաժանելու գործընթացը: Երկու երիտասարդ նրա ձեռքից վերցրել են բջջային հեռախոսը եւ ջնջել տեսանյութը եւ նոր վերադարձրել հեռախոսը: Լրագրող Աննա Զախարյանը հաղորդում է տվել հանցագործության մասին, իսկ Ելք դաշինքի քաղաքապետի թեկնածու Նիկոլ Փաշինյանը հրապարակել է լրագրողի հեռախոսում մնացած՝ ընտրակաշառքի դեպքն արձանագրած մեկ տեսնայութ, որը չեն հաջողացրել ջնջել Տարոն Մագարյանի շտաբի անդամները: Սույն միջադեպի գործով ոստիկանության Մալաթիայի բաժնում հետաքննություն է ընթանում: