ՀՀԿ նախընտրական շտաբը հայտարարություն է տարածել եւ նշել, որ քաղաքապետի թեկնածու Նիկոլ Փաշինյանի տարածած նյութերը որեւէ առնչություն չունեն ՀՀԿ նախընտրական գործունեության հետ:
«Ծանոթանալով ԱԺ պատգամավոր Նիկոլ Փաշինյանի ֆեյսբուքյան էջում հրապարակված տեսանյութին, որտեղ մեր մրցակիցները ներկայացնում են Երեւանի Արաբկիր շրջանի աղբամաններից մեկում հայտանաբերված եւ իբր ՀՀԿ նախընտրական ենթաշտաբերի գործունեությանը առնչվող նյութեր, հայտնում ենք հետեւյալը՝
1. Ներկայացված նյութերը որեւէ առնչություն չունեն ՀՀԿ նախընտրական գործունեության հետ:
2. Մեր ենթաշտաբերը տեղերում նախընտրական գումար չեն առաջարկում, չեն բաժանում, միաժամանակ գնահատում ենք ուղեցույցի՝ հումորով գրված տեքստը եւ այն ներկայացնողի կատարողական վարպետությունը:
3. Ներկայացված նյութերի իրական ծագումը եւ միջադեպի հետ կապված այլ հանգամանքներ պարզելու դեպքում շնորհակալ կլինենք իրավապահ մարմիններին:
4. Եվս մեկ անգամ կոչ ենք անում մեր քաղաքական մրցակիցներին զերծ մնալ քարոզչական ապատեղեկատվական գործողություններից, չպիտակավորել մյուս մասնակիցներին, գնալ քաղաքապետի ընտրություններին մաքուր ձեռքերով եւ մաքուր խղճով»,-ասված է հայտարարությունում:
Ավելի վաղ տեղեկացրել էինք, որ Նիկոլ Փաշինյանն իր ֆեյսբուքյան էջում տեսանյութ էր հրապարակել, նշելով, որ «Ելք» դաշինքի ձեռքի տակ են հայտնվել մարդկանց անուններով ցուցակներ, որոնք, պետք է ձայներ բերեն քաղաքապետ, քաղաքապետի թեկնածու Տարոն Մարգարյանի համար: Նիկոլ Փաշինյանն իր ֆեյսբուքյան էջում տեսանյութ է տեղադրել, որտեղ կարդում է ոստիկանության ՊՊԾ գնդի աշխատակիցների անուններով ցուցակ, որոնք ձայներ պետք է բերեն Տարոն Մարգարյանի համար:
