Վարչապետ Կարեն Կարապետյանը չի շտապում «Ելք» դաշինքի ներկայացրած ընտրակաշառքի վերաբերյալ ահազանգերը համարել հենց ընտրակաշառք:
Այսօր՝ մայիսի 14-ին, Երեւանի քաղաքապետի ընտրություններին քվեարկությունից հետո լրագրողների հետ զրույցում վարչապետը հորդորեց սպասել իրավապահ մարմինների քննության արդյունքներին:
«Կարծում եմ՝ տարեցտարի մեր ընտրությունները ավելի արդար են եւ թափանցիկ: Բոլոր ընտրությունների ժամանակ նմանատիպ դեպքեր լինում են, բայց մենք վստա՞հ ենք, որ դա ընտրակաշառք է, իրավապահ մարմինները դրանով զբաղվում են: Մենք մի նյութով, թղթով միանգամից եզրակացություն ենք անում, ուզում ենք չէ՞ օրենքի երկիր դառնանք, եկեք սպասենք, տեսնենք՝ իրավապահներն ինչ կասեն»,- ասաց Կարեն Կարապետյանը:
Ինչ վերաբերում է նույն «Ելք» դաշինքի մեկ այլ հայտարարության, թե ոստիկանության աշխատակիցները ձայներ են հավաքել քաղաքապետի թեկնածու Տարոն Մարգարյանի համար, վարչապետը նշեց, որ ինքն այդ թղթերը չի տեսել, լսել է միայն:
Հիշեցնենք, որ «Ելք» դաշինքի անդամները հրապարակել են Տարոն Մարգարյանի շտաբի մոտ գտնվող աղբարկղից հայտնաբերված փաստաթղթեր, որոնցում երեւում է, թե ոստիկանության ՊՊԾ գնդի աշխատակիցները քանի ձայն են ապահովելու Տարոն Մարգարյանի համար: Միեւնույն ժամանակ կան ընտրակաշառքի վերաբերյալ թղթեր: Ի դեպ, լրագրող Աննա Զախարյանը ոստիկանություն հաղորդում էր տվել, որ հարձակման է ենթարկվել, երբ նկարահանում էր այդ նույն շտաբում ընտրակաշառքի բաժանումը։ Նիկոլ Փաշինյանը հրապարակել է լրագրողի հեռախոսում պահպանված տեսանյութը, որը չէին հասցրել ոչնչացնել Տարոն Մարգարյանի շտաբի անդամները։ Այս միջադեպի առթիվ Մալաթիա – Սեբաստիա համայնքի ոստիկանությունում քննություն է իրականացվում։ Նիկոլ Փաշինյանն ու իր թիմակիցները դիմել էին ԿԸՀ՝ պահանջելով չեղարկել ՀՀԿ-ի գրանցումը: Կենտրոնական ընտրական հանձնաժողովը մերժել է դիմումը: