Գլխավոր դատախազության հատկապես կարևոր գործերով քննության վարչության պետի տեղակալ Սևակ Հովհաննիսյանը պնդում է, որ «Երկիր Ծիրանի» կուսակցության առաջնորդ, քաղաքապետի թեկնածու Զարուհի Փոստանջյանի նկատմամբ բռնություն չի կիրառվել
«Ես այնտեղ բռնի ուժի ականատես չեմ եղել, ոստիկանության գործողությունները իրավաչափ էին: Այն, ինչ տեղի ունեցավ այնտեղ, իրավաչափ էր: Եթե պետք է տեղի ունենա որոշակի դատավարական գործընթաց, եթե իրավունք չունի ներկա գտնվելու, ուրեմն իրավունք չունի այնտեղ ներկա գտնվել»,- այսօր՝ մայիսի 14-ին, Կենտրոնական ընտրական հանձնաժողովում լրագրողների հետ զրույցում ասաց Սեւակ Հովհաննիսյանը:
Հիշեցնենք, որ Ավան թաղամասում Տարոն Մարգարյանի նախընտրական շտաբում այսօր միջադեպ է գրանցվել: Զարուհի Փոստանջյանը շտաբ էր գնացել եւ պնդում էր, որ այնտեղ գտնվող դարակներում ընտրակեղծարարության փաստեր կան: Շտաբի անդամները, սակայն, նրան այդպես էլ թույլ չտվեցին բացել դարակները, իսկ հրավիրված ոստիկանության աշխատակիցները բռնի ուժով հեռացրին Զարուհի Փոստանջյանին: Նրանք ցանկանում էին բերման ենթարկել պատգամավորին, սակայն հետո կիսատ թողեցին գործողությունը, իսկ նրա դստերը՝ բերման ենթարկեցին: