Երեւանի ավագանու ընտրությունները կայացան, Կենտրոնական ընտրական հանձնաժողովն էլ հրապարակեց նախնական արդյունքները: Դրանց համաձայն՝ հաղթել է Հանրապետական կուսակցությունը՝ ստանալով 71.25 տոկոս ձայն: Հենց ՀՀԿ-ի ընտրացուցակը գլխավորող Տարոն Մարգարյանն էլ քաղաքապետ կդառնա: «Ելք» դաշինքը ստացել է 21, իսկ «Երկիր Ծիրանի» կուսակցությունը՝ 7.75 տոկոս ձայն: Այսպիսով՝ Երեւանի ավագանու 65 մանդատից 46-ը բաժին կհասնի Հանրապետական կուսակցությանը, «Ելք» դաշինքը կունենա 14, «Երկիր Ծիրանի»-ն՝ 5 մանդատ:
Ընտրողներն այս անգամ բավական պասիվ են եղել. ԿԸՀ-ի նախնական տվյալներով՝ մայիսի 14-ի քվեարկությանը մասնակցել է 345.226 մարդ կամ ընտրողների 40.99%-ը:
«Ելք» դաշինքում ընտրությունների արդյունքներից, ընդհանուր առմամբ, գոհ են: Նիկոլ Փաշինյանն ասում է՝ իրենց նպատակը, իհարկե, հաղթանակն էր, բայց նախկինում Երեւանի ավագանիում տեղ չունեին, հիմա 14 ներկայացուցիչ կունենան: Փաշինյանը սա հաջողություն է համարում, նաեւ կարծում է, որ այս ընտրությունները մեկ բան հաստատ արձանագրեցին. Հայաստանի քաղաքական կյանքում «Ելք»-ի դիրքերն ուժեղանում են, դաշինքը կայուն ընտրազանգված ունի:
Փաշինյանը քաղաքապետ չդարձավ, ավագանիում էլ տեղ ունենալ չի ցանկանում: Փոխարենը կվերցնի պատգամավորական մանդատը: Հետընտրական գործընթացների կարիք «Ելք» դաշինքում չեն տեսնում: Նիկոլ Փաշինյանը բացատրել է, թե ինչու:
Ինչ վերաբերում է Երեւանի ավագանիում ընդդիմադիր երկու ուժերի՝ «Ելք» դաշինքի եւ «Երկիր Ծիրանի» կուսակցության համագործակցությանը: «Ելք»-ից Էդմոն Մարուքյանն ասում է՝ դեռ պետք է հասկանալ, արդյո՞ք «Երկիր Ծիրանի»-ն կվերցնի մանդատները: Ամեն դեպքում, դաշինքը պատրաստ է համագործակցել:
«Երկիր Ծիրանի»-ն ընտրությունների արդյունքներին այսօր չի արձագանքել. խոստացել են իրենց կարծիքը հայտնել վաղը: Փոխարենը կուսակցության ղեկավար Զարուհի Փոստանջյանն այսօր հայտարարություն է տարածել մայիսի 14-ին իր եւ իր դստեր մասնակցությամբ ՀՀԿ-ի նախընտրական շտաբերից մեկում տեղի ունեցած միջադեպին: Նա նշել է, որ դեպքից 24 ժամ անց իրավապահների կողմից որեւէ արձագանք չկա, չնայած իրենք դիմել են բուժօգնության եւ հաստատել մարմնական վնասվածքներ ստանալու փաստը:
Ինչ վերաբերում է ընտրությունների ընթացքին. մայիսի 14-ին կայացած քվեարկության վերաբերյալ Կենտրոնական ընտրական հանձնաժողովն ահազանգեր ստացել է, գրավոր բողոքներ՝ ոչ: Բայց քվեաթերթիկների հաշվարկի կամ քվեարկության արդյունքների վերաբերյալ բողոք ներկայացնելու ժամանակ դեռ կա:
Իսկ իրավապահ մարմինները խախտումների վերաբերյալ ահազանգեր ստացել են: Ոստիկանությունը 109 ահազանգ է ստացել, 39-ի մասով հետաքննություն է կատարվում: Դրանք վերաբերում են ընտրակաշառքին, ընտրողի ազատ կամքի, դիտորդի լիազորությունների իրականացմանը խոչընդոտելուն, բազմակի քվեարկության դեպքերին: Ընտրախախտումների մասին 10 ահազանգ ստացել է Քննչական կոմիտեն, 117 հաղորդում էլ ուսումնասիրում է գլխավոր դատախազությունը:
Հայաստանի պաշտպանության նախարարության զորամասերից մեկի մարտական դիրքում մայիսի 14-ին ժամկետային զինծառայող Արշակ Արշակյանին մահացած են հայտնաբերել: Նա Կոտայքի մարզի Բյուրեղավան քաղաքից էր, միակողմանի ծնողազուրկ: 19-ամյա Արշակի հայրը մահացել է Ռուսաստանում արտագնա աշխատանքի ժամանակ, կրտսեր սերժանտն ապրում էր մոր եւ եղբոր հետ: Առայժմ հայտնի չէ, թե ինչն է զինծառայողի մահվան պատճառը: Արշակյանին հայտնաբերել են կզակի շրջանում հրազենային վնասվածքով:
Հարազատների պնդմամբ՝ նա բանակում որեւէ խնդիր չի ունեցել: Վերջին անգամ նրանց հետ հեռախոսով զրուցելիս բարձր տրամադրություն է ունեցել: Քննչական կոմիտեում քննություն է տարվում՝ Արշակ Արշակյանի մահվան հանգամանքները պարզելու համար:
Ֆրանսիայի վարչապետի պաշտոնը ստանձնել է աջակողմյան «Հանրապետականներ» կուսակցության ներկայացուցիչ Էդուար Ֆիլիպը: Նրա անունը ֆրանսիական լրատվամիջոցներում շրջանառվում էր դեռեւս անցյալ շաբաթվանից: Նորընտիր նախագահ Էմանուել Մակրոնի կուսակցության ներկայացուցիչները կարծում են, որ Ֆիլիպն ամենահարմար թեկնածուն է այդ պաշտոնում. նա խորհրդարանական փորձ ունի, վարչապետի համար անհրաժեշտ բոլոր հատկանիշները: 46-ամյա Էդուար Ֆիլիպը քաղաքական կարիերան սկսել է Սոցիալիստական կուսակցության շարքերում, բայց հետո հարել է աջակողմյաններին:
Եվրոպայում զանգվածային հաքերային հարձակման զոհերի թիվը չի աճում։ Եվրոպոլում սա հաջողություն են համարում: Այստեղ ենթադրում են, որ պատճառն այն է, որ համակարգիչների օգտատերերն ու համակարգչային ադմինիստրատորները, հավանաբար, վերջապես ներբեռնել են ծրագրային թարմացումները, որոնք պաշտպանում են վնասակար WannaCrypt ծրագրից: Եվրոպոլը, սակայն, դեռ վաղ է համարում խոսել հարձակման հետեւում կանգնածների մասին: Մինչդեռ Ռուսաստանի նախագահ Վլադիմիր Պուտինը մատնանշել է, որ Microsoft-ում, որի Windows օպերացիոն համակարգը տուժել է հարձակումից, զանգվածային հարձակումը կապել են ամերիկյան հատուկ ծառայությունների գործողությունների հետ:
Գլոբալ կիբեր հարձակումը սկսվել է մայիսի 12-ին: Վիրուսը, որն արդեն շորթող անվանումն է ստացել, արգելափակում է համակարգիչն ու 300 դոլար պահանջում՝ ապարգելափակման համար: Մի քանի օրվա ընթացքում վիրուսը ստեղծողներն ավելի քան 50 հազար դոլարի բիթքոին են հավաքել: Վերջին տվյալներով՝ WannaCrypt վիրուսից տուժել են 150 երկրների ավելի քան 200 հազար օգտատերեր: Կիբերգրոհն առավել ակտիվ է եղել Ռուսաստանում, Ուկրաինայում եւ Թայվանում: Ու եթե Եվրոպայում հարձակումը դադարել է, WannaCrypt վիրուսն ասիական երկրներում շարունակում է տարածվել:
Հանրապետությունում տեղի ունեցած արտակարգ պատահարների մասին: Վանաձորում ճանապարհը փլուզվել է, արդյունքում «ԿամԱԶ» մակնիշի բեռնատարը գրեթե կողաշրջվել է: Բարեբախտաբար՝ տուժածներ չկան: Տարածքում սողանքների մասին բնակիչները բազմիցս են ահազանգել Վանաձորի քաղաքապետարան: Եկել են, խիճ լցրել ու գործն ավարտված համարել: Իսկ հիմա՝ պատահարից հետո, քաղաքապետարանում փորձում են պարզել, թե ով է պատասխանատու ճանապարհի անբարեկարգ վիճակի համար:
Իսկ Երեւանում «Էրեբունի» բուժկենտրոնի մոտակայքում «Jeep Grand Cherokee» մակնիշի մեքենան բախվել է էլեկտրական սյանը, գազի արտահոսք է սկսվել: Մինչ փրկարարների ժամանումը 52-ամյա ուղեւորին հիվանդանոց են տեղափոխել: Նրա վիճակը ծանր է:
Մեկ այլ խոշոր վթար է տեղի ունեցել Կիեւյան փողոցում: Իրար են բախվել «Toyota», «Mitsubishi» եւ «Mercedes» մակնիշների ավտոմեքենաները: «Toyota»-ի վարորդը եւ ուղեւորը հոսպիտալացվել են: 25-ամյա ուղեւորի վիճակը ծանր են գնահատել:
Մայիսի 15-ին դոլարը փոքր-ինչ էժանացել է, իսկ եվրոն՝ 4 դրամով թանկացել: Արդյունքում դոլարի փոխարժեքն այսօր կազմել է 484 դրամ, եվրոյինը՝ 530, ռուբլունը՝ 8 դրամ 60 լումա, ֆունտինը՝ 625 դրամ:
Մայիսի 16-ին հանրապետության հյուսիսային շրջաններում սպասվում է անձրեւ եւ ամպրոպ, առանձին վայրերում հնարավոր է կարկուտ: Օդի ջերմաստիճանն էապես չի փոխվել: Երեւանում վաղը տեղումներ չեն սպասվում: Մայրաքաղաքում գիշերը կդիտվի +8+10, ցերեկը՝ +24+26 աստիճան տաքություն: