2016 թվականի օգոստոսին վիզային ռեժիմի չեղարկումից հետո Իրանից Հայաստանի սահմանամերձ քաղաքներ մեկօրյա ուղեւորությունների թիվն ավելացել է: Այս մասին NEWS.am-ի թղթակցի հետ զրույցում նշեց Մեղրիի խոշորացված համայնքի ղեկավար Մխիթար Զաքարյանը: Համայնքը միավորում է Իրանի հետ սահմանակից Մեղրի եւ Ագարակ քաղաքներն ու հարակից գյուղերը:
Նախկինում զբոսաշրջիկները հիմնականում Երեւան էին մեկնում, իսկ Հայաստանի հարավը միայն անցնելիս էին տեսնում: Հիմա սահմանամերձ շրջանների բնակիչները հաճույքով նաեւ հարեւաններին են հյուր գնում: Առավոտյան գալիս են Արաքսի հայկական ափ, երեկոյան՝ հետ վերադառնում: Ընդ որում՝ Երեւան ժամանում են առավելապես մարտին՝ Նովրուզի տոներին, իսկ Մեղրի՝ նաեւ այլ ամիսներին:
«Օգտվում են ե՛ս ռեստորաններից, ե՛ւ հյուրանոցներից: Իհարկե՝ ոչ այնքան շատ, բայց, ամեն դեպքում, նկատելի է: Բայց մեզ մոտ դեռ հյուրանոցներ գրեթե չկան էլ: Ամենախոշորն Ագարակում է. 12 համար ունի՝ 36 տեղով: Իսկ եթե վերցնենք Մեղրին ու գյուղերը, փոքր հյուրանոցներով ու հյուրատներով հազիվ 70-ի կհասնի:
Բայց, ամեն դեպքում, Իրանից զբոսաշրջիկների թիվն ավելանում է, եւ կցանկանայի, որպեսզի հյուրանոց կառուցելու հայտ ներկայացնեին: Քանի որ ժամանողների թիվն իսկապես ավելի մեծ է»,- հայտարարեց Զաքարյանը:
