Ցանցահենները The Walt Disney-ից ֆիլմ են գողացել եւ սպառնացել այն համացանցում տեղադրել մինչեւ շնորհանդեսը։ Այս մասին հաղորդում է Hollywood Reporter-ը՝ վկայակոչելով ընկերության ղեկավար Ռոբերթ Այգերին։
Պարոն Այգերի խոսքով՝ ցանցահեններն ընկերությունից պահանջել են վճարել՝ հակառակ դեպքում սպառնալով ֆիլմը մաս առ մաս թողարկել։ The Walt Disney-ի ղեկավարն ասել է, որ չարագործները պահանջել են հսկայական գումար վճարել՝ Bitcoin-ներով։ Նրանք խոստացել են նախ համացանցում տեղադրել ֆիլմից 5 րոպե տեւողությամբ մի հատված, ապա ներբեռնել 20 րոպե տեւողությամբ հատվածներ՝ մինչեւ նրանց պահանջները կկատարվեն, գրում է «Կոմերսանտ»-ը։
Ռոբերթ Այգերը ֆիլմի անվանումը չի նշել, սակայն ընդգծել է, որ ստուդիան հրաժարվել է վճարել։ Deadline-ի տվյալներով՝ խոսքը «Կարիբյան ծովի ծովահենները. Մեռյալները հեքիաթներ չեն պատմում» ֆիլմի մասին է։ Գործի հետաքննությամբ զբաղվում են դաշնային քննիչները։