2017թ. մայիսի 12-ին «Հայկական ժամանակ» օրաթերթի լրագրող Աննա Սամվելի Զախարյանը ՀՀ ոստիկանության Երեւան քաղաքի վարչության Մալաթիայի բաժնում հաղորդում,  ապա նաեւ բացատրություն է տվել այն մասին, որ սույն թվականի մայիսի 11-ին՝ ժամը 20:30-ից մինչեւ 21:00-ն ընկած ժամանակահատվածում, Երեւան քաղաքի Կուրղինյան փողոցի 11/3 հասցեում գտնվող Երեւանի քաղաքապետի թեկնածու Տարոն Մարգարյանի նախընտրական շտաբում քաղաքացիներին բաժանվել են քվեաթերթիկներ եւ ընտրակաշառք, իսկ երբ ինքն այդ ամենը փորձել է նկարահանել, մի երիտասարդ՝ խոչընդոտելով լրագրողի իր մասնագիտական օրինական գործունեությանը, ձեռքից խլել է  «NOKIA» մոդելի բջջային հեռախոսը, մտել նշված շտաբ եւ բջջային հեռախոսից հեռացրել հեռախոսահամարներն ու կարճ հաղորդագրությունները, իսկ դրանից մոտ 15 րոպե հետո մեկ այլ երիտասարդ անվնաս վիճակում վերադարձրել է իր բջջային հեռախոսը:

Դեպքի առթիվ ՀՀ ոստիկանության Մալաթիայի բաժնում նախապատրաստվել  են նյութեր, կատարվել են անհրաժեշտ  անհետաձգելի քննչական, դատավարական գործողություններ:

Նախապատրաստված նյութերի արդյունքում Երեւան քաղաքի Մալաթիա-Սեբաստիա վարչական շրջանների դատախազության  դատախազի կողմից ԶԼՄ-ի ներկայացուցչի լիազորությունների իրականացմանը խոչընդոտելու եւ առերեւույթ ընտրակաշառք տալու դեպքերի առթիվ 16.05.2017թ. ՀՀ քրեական օրենսգրքի 149-րդ հոդվածի 1-ին մասի եւ 154.2-րդ հոդվածի 2-րդ մասի հատկանիշներով հարուցվել է քրեական գործ, որի նախաքննությունը հանձնարարվել է ՀՀ հատուկ քննչական ծառայությանը: