Մայիսի 16-ին ամերիկահայերը բողոքի ակցիա կանցկացնեն Սպիտակ տան դիմաց, որպեսզի իրենց բողոքն արտահայտեն ընդդեմ Թուրքիայի նախագահ Ռեջեփ Թայիփ Էրդողանի Վաշինգտոն այցի եւ նախագահ Դոնալդ Թրամփի հետ հանդիպման:
«Սա Էրդողանին դիմակայելու Թրամփի հնարավորությունն է»,- հայտարարել է Ամերիկայի Հայ դատի հանձնախմբի գործադիր տնօրեն Արամ Համբարյանը՝ հավելելով, որ ժամանակն է բարձրաձայն հայտարարել Թուրքիայի կառավարության քողարկված արշավի մասին, որի նպատակն է արտասահմանյան գործակալներին եւ լոբբիստներին կասկածելի վարձատրությունների ճանապարհով ԱՄՆ քաղաքականության վրա ազդելը:
Համբարյանը նախագահ Թրամփին կոչ է արել սկսել առաջ մղել ամերիկյան սկզբունքները եւ առաջնահերթությունները՝ անտեսելով Անկարայի լռության դավադրությունը ԱՄՆ-ում Հայոց ցեղասպանության զոհերի հիշատակման դեմ:
Ամերիկայի Հայ դատի գրասենյակը քրդական, հունական եւ ասորական կազմակերպությունների հետ կհավաքվի Սպիտակ տան դիմաց, որպեսզի ուշադրություն գրավի Թուրքիայի նախագահ Էրդողանի բռնաճնշումների եւ երկրի սահմաններից դուրս ագրեսիայի վրա:
