Լարվածություն շփման գծում: Ադրբեջանական կողմը մայիսի 15-ին հերթական սադրանքին է դիմել՝ «ՍՊԱՅԿ» տեսակի կառավարվող հրթիռից կրակ բացելով Արցախի պաշտպանության բանակի ռազմական օբյեկտի ուղղությամբ: Արդյունքում վառելանյութի մեքենա է մասնակի վնասվել: Ադրբեջանական սադրանքի հետեւանքով հայկական կողմը մարդկային կորուստ չունի: Շփման գծում լարված է եղել նաեւ գիշերը: Հակառակորդը տարբեր տրամաչափի հրաձգային զինատեսակներից, ականանետից եւ հակատանկային նռնականետից հայ դիրքապահների ուղղությամբ ավելի քան 1200 կրակոց է արձակել: Հայկական կողմը հարկադրված է եղել պատասխան գործողությունների դիմել:
«Երկիր Ծիրանի»-ն օգտվել է Կենտրոնական ընտրական հանձնաժողով բողոք ներկայացնելու հնարավորությունից եւ պահանջում է անվավեր ճանաչել Երեւանի ավագանու ընտրությունների արդյունքները: Դիմում-բողոքում նշվում է կուսակցության արձանագրած «համատարած կեղծարարությունների, մարդկանց կաշառելու, ուղղորդելու փաստերի, քաղաքապետի թեկնածու Զարուհի Փոստանջյանի եւ նրա վստահված անձ Լիլիթ Դրամփյանի նկատմամբ բռնության» եւ դեպքերի մասին: Կուսակցությունում կարծում են, որ այս ամենն ազդել է ընտրությունների արդյունքի վրա:
Թիվ 7 տարածքային հանձնաժողովն էլ ընդունել է երկու տեղամասում քվեաթերթիկների վերահաշվարկի մասին «Ելք» դաշինքի դիմումները: 7/51 ընտրական տեղամասում ավագանու ընտրությունների արդյունքների վերահաշվարկի ժամանակ ցնդող գրիչով քվեարկած քվեաթերթիկներ են հայտնաբերվել: Անվավեր ճանաչված քվեաթերթիկների մեծ մասը դատարկ է եղել, ինչը տարօրինակ է թվացել «Ելք» դաշինքի ներկայացուցիչներին: Հիմա մնում է, որ Կենտրոնական ընտրական հանձնաժողովը որոշում կայացնի այս տեղամասերում ընտրությունների արդյունքներն անվավեր ճանաչելու-չճանաչելու վերաբերյալ: «Ելք»-ի ներկայացուցիչ Վահագն Հովակիմյանը կարծում է, որ փաստերով պետք է նաեւ դատախազությունը զբաղվի:
Մինչ այդ, Տարոն Մարգարյանը պատրաստվում է նոր ժամկետով պաշտոնավարմանը: Այսօր քաղաքապետարանում կայացած աշխատանքային խորհրդակցության ժամանակ Մարգարյանն ասել է, որ այսուհետ պետք է կրկնապատիկ եռանդով, նույնիսկ արտակարգ ռեժիմով աշխատեն: Նշել է, որ քաղաքացիներից արդեն բազմաթիվ նոր առաջարկներ են ստացել: Քննարկելու են դրանք եւ անհրաժեշտության դեպքում ծրագրային առաջնահերթություն են դարձնելու՝ փորձելով կյանքի կոչել:
Հայաստանի մեկ այլ քաղաք էլ՝ Արտաշատը, քաղաքապետ չունի: «Ծառուկյան» դաշինքի ցուցակով պատգամավոր ընտրված Արգամ Աբրահամյանը՝ Հովիկ Աբրահամյանի որդին, հրաժարականի դիմում է ներկայացրել: Ֆեյսբուքյան գրառման մեջ նա նշել է, որ վայր է դնում քաղաքապետի՝ անչափ պատասխանատու լիազորությունները, «Ազգային ժողովի պատգամավորի մանդատով նոր` ավելի ծանր պատասխանատվություն ստանձնելու համար»:
Առայժմ հայտնի չէ, թե ով կփոխարինի Արգամ Աբրահամյանին. Հանրապետական կուսակցությունում թեկնածուի հարցը դեռ չեն քննարկել: Արտաշատում լուրեր են տարածվել, որ ՀՀԿ-ն առաջադրելու է Հովիկ Աբրահամյանի վաղեմի հակառակորդի՝ «գազի Հովո» անունով հայտնի Հովհաննես Ղազարյանի թեկնածությունը: Ղազարյանը, սակայն, առայժմ չի հաստատում այս տեղեկությունները: Լուրեր կան, որ Հովիկ Աբրահամյանն էլ ուզում է Արտաշատի քաղաքապետի պաշտոնում տեսնել իր մորաքրոջ որդուն՝ քաղաքապետի տեղակալ Գագիկ Պողոսյանին:
Հրազդան քաղաքի այգիներից մեկում արկղի մեջ նորածնի դի են հայտնաբերել: Փոքրիկի մարմինը փաթաթված է եղել պոլիէթիլենային պարկով: Երեխան արական սեռի է, նախնական տվյալով՝ առավելագույնը մեկ օրական: Քննչական կոմիտեի տեղեկացմամբ՝ նորածնի մարմնի վրա բռնության հետքեր չեն հայտնաբերվել: Երեխայի մահվան հանգամանքները դեռեւս պարզ չեն: Հայտնի չէ նաեւ, թե ովքեր են նրա ծնողները եւ ինչպես է հայտնվել այգում: Իրավապահները ստուգում են հանրապետության ծննդատներում հաշվառված ծնունդների ցուցակները, նաեւ քննչական գործողություններ իրականացնում Հրազդանի թաղամասերում եւ շրջակա գյուղերում՝ երեխայի ծնողներին գտնելու համար:
Լոռու մարզում Հաղպատ գյուղի մոտ քարաթափման հետեւանքով դեպի Վրաստանի սահման տանող ճանապարհը որոշ ժամանակ երկկողմանի փակ է եղել: Քարաթափումը տեղի է ունեցել Ալավերդի-Ախթալա ավտոճանապարհի 5-րդ կմ-ին: Շուրջ երկու ժամ անց հաջողվել է Վանաձոր-Ալավերդի-Վրաստանի սահման միջպետական նշանակության ավտոճանապարհի փլուզված հատվածում երթեւեկությունը միակողմանի վերականգնել: Պատահարի հետեւանքով, բարեբախտաբար, տուժածներ չկան:
Արագածոտնի մարզում խոշոր ավտովթար է տեղի ունեցել, անչափահաս երեխաներ են տուժել: Երեւան-Գյումրի ավտոճանապարհին բախվել են «ՎԱԶ 2106» եւ Volkswagen մակնիշների ավտոմեքենաները: Բախման հետեւանքով «ՎԱԶ 2106»-ը դուրս է եկել երթեւեկելի գոտուց եւ կողաշրջվելով՝ հայտնվել դաշտամիջյան հատվածում։ Վթարի հետեւանքով 5 վիրավոր կա, այդ թվում՝ 2 անչափահաս երեխա: Թալինի բուժկենտրոն հոսպիտալացված երեխաներն արդեն դուրս են գրվել, իսկ աչքի վնասվածք ստացած վարորդին Երեւան են տեղափոխել:
Մայիսի 16-ին դոլարը շարունակել է նվազել, իսկ եվրոն թանկացել է եւս 4 դրամով: Արդյունքում դոլարի փոխարժեքն այսօր կազմել է 484 դրամ, եվրոյինը՝ 534, ռուբլունը՝ 8 դրամ 58 լումա, ֆունտինը՝ 623 դրամ:
Մայիսի 17-ին հանրապետությունում սպասվում է առանց տեղումների եղանակ: Օդի ջերմաստիճանը 3-4 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +10+12, ցերեկը՝ +25+27 աստիճան տաքություն: