Ռուսաստանը առաջիկա 2-3 ամիսներին Հայաստանի Արտակարգ իրավիճակների նախարարությանը կտրամադրի 30 մլն դոլարի տեխնիկա ու սարքավորումներ։
Արտակարգ իրավիճակների նախարար Դավիթ Տոնոյանը ու Հայաստանում Ռուսաստանի արտակարգ ու լիազոր դեսպան Իվան Վոլինկինը մայիսի 17-ին Հումանիտար արձագանքման հայ- ռուսական կենտրոնում ծանոթացել են փրկարարական տեխնիկայի առաջին 3 խմբաքանակների հետ։ Սարքավորումները նախատեսված են Հայաստանի ԱԻՆ-ի փրկարարական ծառայությունների հմտությունների բարելավման ու սարքավորումների արդիականացման համար։ Տեխնիկան տրամադրվելու է Հումանիտար արձագանքման հայ- ռուսական կենտրոնի ստեղծման մասին միջկառավարական համաձայնագրի շրջանակում։ Փրկարարական սարքավորումները ներառում են փրկարարական գործիքներ, բազմաֆունկցիոնալ, հիդրավլիկ փրկարարական գործիքներ, տարբեր հզորությունների գեներատորներ, որոնք նախատեսված են վթարային վերականգնողական աշխատանքներ կատարելու համար։
Դեսպան Իվան Վոլինկինի խոսքով, Ռուսաստանի տրամադրած սարքավորումները շատ անհրաժեշտ ու կարեւոր են։ «Այդ սարքավորումների շնորհիվ Կենտրոնը կարող է արդեն լիահուն աշխատել։ Եվ սա միայն սկիզբն է՝ 2017-18 թթ․ նոր սարքավորումներ են մատակարարվելու։ Այդ սարքավորումները կարող են ավելի լայն կիրառում ունենալ՝ արտակարգ իրավիճակներին տարածաշրջանային արձագանքման ոլորտում»,- շեշտեց դեսպանը։
Հումանիտար արձագանքման հայ- ռուսական կենտրոնին տրամադրվող տեխնիկան ծառայելու է Հայաստանում, Ռուսաստանում ու հնարավոր է նաեւ երրորդ երկրում արտակարգ իրավիճակներին արձագանքելուն։ Հաջորդ խմբաքանակը կտեղափոխվի երկիր առաջիկա շաբաթների ընթացքում։ Փրկարարական տեխնիկան ներառելու է ամենատարբեր տեսակի փրկարարական սարքավորումներ, նաեւ հրշեջ- փրկարարական մեքենաներ։
