ԱՄՆ նախագահի նախկին խորհրդական Մայքլ Ֆլինը, որը հրաժարական է տվել այս տարվա փետրվարին ու ինչպես հետագայում պարզվել է ՝ փողի դիմաց Թուրքիայի շահերն էր առաջ մղում, իր հեռացումից մի քանի շաբաթ առաջ հօգուտ Անկարայի որոշում էր կայացրել։ Չինովնիկյը խոչընդոտել էր սիրիական Ռաքքա քաղաքում ԻՊ-ի դեմ գործողություն իրականացնելուն, որը ենթադրում էր ամերիկացի զինվորականների համագործակցությունը քրդերի հետ ու դրանով իսկ ձեռնտու չէր Թուրքիայի ղեկավարությանը։
Այդ իրադարձությունները տեղի էին ունեցել դեռ մինչեւ ԱՄՆ նախագահ Դոնալդ Թրամփի երդմնակալությունը, հայտնում է Newsru –ն՝ վկայակոչելով ամերիկյան McClatchy DC պարբերականը։ Թրամփի երդմնակալությունից 10 օր առաջ նրա նախորդ Բարաք Օբամայի ազգային անվտանգության հարցերով խորհրդական Սյուզան Ռայսը պատմել էր ԻՊ «մայրաքաղաք» Ռաքքան սիրիական քրդերի ուժերի օգնությամբ վերադարձնելու՝ Պենտագոնի ծրագրերի մասին։
Օբամայի թիմը որոշել էր Թրամփին դիմել ծրագիրը հաստատելու համար, քանի որ ենթադրվում էր, որ այն իրականացվելու է նրա նախագահության օրոք։ Սակայն Ֆլինը առանց երկմտելու Ռայսին ասել էր, որ այդ միառժամանակ հրաժարվեն այդ քայլից, այսինքն ԻՊ-ի դեմ գործողությունը մի քանի ամսով հետաձգվել էր։
«Եթե Ֆլինը նույնիսկ բացատրել էր իր պատասխանը, ապա դա չի ձայնագրվել ու հայտնի չէ, արդյոք նա անցումային թիմից որեւէ մեկի հետ խորհրդակցել էր նման որոշում կայացնելուց առաջ,- նշում է պարբերականը,- Բայց նրա դիրքորոշումը համապատասխանում էր Թուրքիայի ցանկություններին, որը դեմ է քրդական ուժերի հետ ԱՄՆ-ի համագործակցությանը , իսկ Թուրքիան Ֆլինի չհայտարարագրված հաճախորդն էր»։
Պարբերականը նշում է, որ վերջին հաշվով Թրամփը հաստատել է Ռաքքայի վերաբերյալ ծրագիրը, բայց Ֆլինին հեռացնելուց մի քանի շաբաթ հետո։
Ֆլինի հրաժարականից մեկ ամիս անց The New York Times թերթը հայտնել է, որ նա իր ղեկավարության ժամանակ լոբիստական գործունեություն էր իրականացնում հօգուտ Թուրքիայի՝ դրա դիմաց ստանալով գումար։ Դեռ մինչեւ խորհրդական նշանալվելը Ֆլինին վարձել էր թուրք ձեռներեց Էկիմ Ալպտեկինը, որը կապեր ունի Թուրքիայի նախագահ Էրդողանի հետ։ Իր լոբիստական գործունեության համար Ֆլինը 530 հազար դոլար է ստացել։ Նրա պայմանագիրը սպառվել է 2016-ի նոյեմբերին։
Ընդ որում Ֆլինը միայն 2017-ի մարտին, արդեն խորհրդականի պաշտոնից հեռանալուց հետո է այդ փաստը բացահայտել ԱՄՆ ԱՆ օտարերկյա գործակալների գրանցման բաժանմունքին ներկայացրած իր հայտարարագրում։ Ըստ փաստաթղթերի ՝ Ֆլինը ստացել է 530 հազար դոլար մի աշխատանքի համար «որը կարող է մեկնաբանվել որպես գլխավորապես Թուրքիային շահերից բխող»։ Ըստ ամերիկյան օրենսդրության՝ որպես օտարերկրյա գործակալ գրանցվելուց հրաժարվելը դաշնային հանցագործություն է»։
