Ադրբեջանական կողմի ոչ մի գործողություն անպատասխան չի մնալու։ Այս մասին NEWS.am-ի թղթակցի հետ զրույցի ժամանակ ասել է ԱԺ պատգամավոր Վահրամ Բաղդասարյանը, որին ՀՀԿ-ն նորից մտադիր է իր խմբակցության ղեկավար ընտրել։
Անդրադառնալով ԼՂՀ-ի հետ շփման գծում Բաքվի վերջին սադրանքներին, պատգամավորը նշեց «Մենք պետք է գտնենք միջոց, որպեսզի վերջապես զսպենք ռազմատենչ հռետորաբանությամբ հանդես եկող այդ պետությունը (որին առհասարակ չի կարելի պետություն համարել)։ Վերջապես, մեզ համար չափից թանկ է յուրաքանչյուր զինծառայողի կյանքը»։ Ադրբեջանական կողմը խուճապի մեջ է ներքաղաքական լարված իրադրության պատճառով, համարում է Բաղդասարյանը։ «Սահմանային սադրանքները սեփական հասարակության ուշադրությունը ներքաղաքական իրավիճակից շեղելու միջոց են»,- հավելեց Վահրամ Բաղդասարյանը։
Հիշեցնենք, որ մայիսի 15-ին եւ լույս 16-ի գիշերը արցախա-ադրբեջանական հակամարտ զորքերի շփման գծում հակառակորդը տարբեր տրամաչափի հրաձգային զինատեսակներից, հրադադարի պահպանման ռեժիմը խախտել է մոտ 55 անգամ՝ հայ դիրքապահների ուղղությամբ արձակելով ավելի քան 1200 կրակոց:
Բացի հրաձգային զինատեսակներից ադրբեջանական զինուժը շփման գծի տարբեր հատվածներում կիրառել է նաեւ 60 միլիմետրանոց ականանետ (3 արկ) եւ հաստոցավոր հակատանկային նռնականետ (9 արկ): Իսկ ՊԲ արեւելյան ուղղությամբ հակառակորդը կիրառել է «ՍՊԱՅԿ» տիպի կառավարվող հրթիռ, ինչի արդյունքում մասնակի վնասվել է մեկ ռազմական տեխնիկա: Ադրբեջանական զինուժի սադրանքի արդյունքում պաշտպանության բանակը մարդկային կորուստ չի ունեցել: