Ռուսաստանի ԱԳՆ-ն քայլեր է ձեռնարկում Բաքվում դատապարտված՝ Ռուսաստանի քաղաքացի Մարատ Ուելդանովի պաշտպանության համար։ Այս մասին ճեպազրույցի ընթացքում հայտնել է Ռուսաստանի ԱԳՆ պաշտոնական ներկայացուցիչ Մարիա Զախարովան։
«Ապրիլի 28-ին Ուելդանովի գործով դատավարությունը ավարտվել է։ Բաքվի ծանր հանցագործությունների հարցերով դատարանը դատապարտել է նրան 8 տարվա աազատազրկման՝ ընդհանուր ռեժիմի գաղութում՝ թմրադեղերի մաքսանենգության մեջ մեղադրանքով։ Դատավարությանը ներկա էր Ռուսաստանի դեսպանատան ներկայացուցիչը։ Դատարանի որոշումը բողոքարկվել է։ Ապրիլի 29-ից սկսած՝ Ուելդանովը գտնվում է Բաքվի թիվ 1 քննչական մեկուսարանում։ Իրադարձությունների հետագա զարգացումը նախատեսում է այդ թվում դատապարտյալի արտահանձնում Ռուսաստանին՝ պատիժը կրելու համար»,- նշել է նա։
Բաքվում Ռուսաստանի դեսպանատունը մշտապես կապի մեջ է թե Ուելդանովի, թե նրա փաստաբանի, թե Ադրբեջանի իշխանությունների հետ ու գործադրում է բոլոր անհրաժեշտ ջանքերը՝ նրա իրավունքների ու շահերի համակողմանի պաշտպանություն ապահովելու համար, շեշտել է Զախարովան։
