ԵՏՄ ոսկերիչների ասոցիացիաների՝ նախօրեին Երեւանում կայացած արտագնա նիստը նվիրված է եղել առկա որոշ խնդիրների լուծմանն ու փոխընկալմանը: Այս մասին ասաց տնտեսական զարգացման եւ ներդրումների հարցերով նախարարի խորհրդական Գագիկ Մկրտչյանը՝ մայիսի 19-ին կայացած մամուլի ասուլիսում:
Խնդիրների թվում նա նշեց ոլորտի ստանդարտների նկատմամբ միասնական մոտեցումների մշակման անհրաժեշտությունը եւ առաջին հերթին՝ հարգի փոխադարձ ճանաչելիությունը. «Հակառակ դեպքում գործարարները կորցնում են ժամանակը, իսկ ժամանակը ոսկի է»: Մկրտչյանի խոսքով՝ նիստի ժամանակ որոշումներ չեն ընդունվել, բայց քննարկվել են դրա ճանապարհները:
Քննարկվել են նաեւ արտահանման, ներմուծման, հարեւան երկրների հետ հարաբերությունների զարգացման հարցեր: Այդ կապակցությամբ նա հիշեցրեց, որ Հայաստանի համար հիմնական գործընկերն ու շուկան մնում է Ռուսաստանը. «Ուստի մենք մեծ նշանակություն ենք տալիս ռուսաստանցի գործընկերների հետ համագործակցության զարգացմանը, համապատասխան բիզնես միջավայրի հետ կապերի հաստատմանը»:
Նախարարի խորհրդականի գնահատականներով՝ ոլորտը զարգանում է արագ տեմպերով, վերջին կես տարվա ընթացքում՝ կրկնակի, եւ այդ տեմպերը կպահպանվեն մինչեւ տարեվերջ, ակնկալվում է նոր պայմանագրերի ստորագրում: