ՀՀ նախկին ոստիկանապետ, ՀՀԿ-ական պատգամավոր Ալիկ Սարգսյանը մայիսի 14-ին՝ Երեւանի ավագանու ընտրությունների ժամանակ Զարուհի Փոստանջյանի հետ կապված միջադեպն համարում է սադրանք: Այսօր՝ մայիսի 19-ին, Ազգային ժողովում նա լրագրողների հետ զրույցում նշել է, որ ոստիկանապետ Վլադիմիր Գասպարյանը կարող է տեղյակ եղած չլինել այդ միջադեպից: Դիտարկմանը, եթե նույնիսկ տեղյակ չի եղել, չպետք է ոստիկանապետը պատասխան տա, նա նշեց:
«Այս երեւույթի մեջ ես ավելի շատ սադրանք եմ տեսնում: Բնականաբար, տեսարանն այնպիսին էր, թե բռնություն եւ այլն....բայց, եթե կինը 10, 20 անգամ դիմելուց հետո որեւիցե կերպ չի արձագանքում եւ այսքան ժամանակ պահանջում է այն, ինչի իրավունքը չունի, դա իրավապահ մարմինների գործառույթում է՝ բնակարան, օֆիս, ինչու չէ ընտրական շտաբ մտնելու եւ խուզարկության տիպի մի բան կատարելու...»,– նշեց նա:
Հիշեցնենք, որ մայիսի 14-ին, երբ Զարուհի Փոստանջյանը ընտրակաշառքի ցուցակների առկայության մասին ահազանգի հետքերով դստեր հետ մտել էր Տարոն Մարգարյանի Ավան վարչական շրջանի շտաբ, նրանց նկատմամբ բռնություն էր գործադրվել նախ՝ Փոստանջյանի պնդմամբ, ՀՀԿ ներկայացուցիչների, այնուհետեւ՝ ոստիկանների կողմից: Փոստանջյանին փորձել էին բերման ենթարկել, սակայն ավարտին չէին հասցրել գործողությունը, իսկ նրա դստերը ոստիկանական մեքենաներով տարել էին:
