Հայաստանի ու Ռուսաստանի միջեւ առեւտրի հարցերը պետք է ավելի ուշադիր վերլուծել։ Այս մասին NEWS.am-ի թղթակցին հայտնել է Ռուսաստանում Հայաստանի առեւտրային ներկայացուցիչ Կարեն Ասոյանը, պատասխանելով ռուսական մաքսատանը հայկական ապրանքների ուշացումների դեպքերի մասին հարցին։ Նկատենք, որ նման դեպքերը դեռ եզակի են ու կանոն չեն կազմում։

Այդուհանդերձ, հավելեց Ասոյանը, դրանցից յուրաքանչյուրի համար ինքը դիմում է Ռուսաստանի Դաշնային մաքսային ծառայության ու Ռոսսելխոզնադզորի ղեկավարությանը։

«Մասնագետներն ինձ ասում են, որ զուտ քիմիական անալիզով մի երկրի արտադրանքը մյուսից տարբերելը հնարավոր չէ։ Նաեւ որովհետեւ այդ նույն լոլիկի տնկիները կարող են ներմուծված լինել, կամ էլ ձկան կերը կամ էլի ինչ-որ բան»,- նշեց նա։

Միջոցներից մեկն է ինվոյսները համեմատել ձեռնարկության արտադրանքի ծավալի մասին հաշվետվությունների հետ։ Մյուս միջոցն է գալ ու տեղում ստուգել արտադրական հզորությունները։

Ռուսաստանի Ռոսսելխոզնադզորի ու Մաքսային ծառայության ներկայացուցիչները եկել էին մարտի վերջին, որպեսզի ստուգեն արդյոք չափազանցված չեն ջերմոցային լոլիկի արտադրության ծավալները։ «Տեսնենք, թե ինչ եզրակացության կհանգեն մեր ռուս գործընկերները։ Մենք պատրաստ ենք ցանկացած պահի պարզաբանել նրանց հետաքրքրող հարցերը»,- նշեց Ասոյանը։