ԵԱՀԿ Մինսկի խմբի վերջին հայտարարություններն ապտակ են Ադրբեջանի ապակառուցողական քաղաքականությանը: Այս մասին NEWS.am-ի թղթակցին ասել է Ազգային ժողովի փոխնախագահ, ՀՀԿ մամուլի քարտուղար Էդուրադ Շարմազանովը:
Խոսելով ԵԱՀԿ Մինսկի խմբի միջնորդների վերջին հայտարարության մասին, որտեղ առաջին անգամ հստակորեն նշվում է ադրբեջանական կողմի շփման գծում հրադադարի ռեժիմը խախտելու մասին` Շարմազանովը նշել է. «Ես կարծում եմ,որ ԵԱՀԿ Միսնկի խմբի համբերության բաժակն արդեն լցվել է, քանի որ սա առաջին դեպքը չէ, երբ Ադրբեջանը ակնհայտորեն խախտում է հրադադարի ռեժիմը, դիմում ագրեսիվ գործողությունների: Այսպես եղավ նաեւ անցյալ տարվա ապրիլին, սակայն, դժբախտաբար,պատասխան գնահատական չտրվեց»: ՀՀ խորհրդարանի փոխնախագահը դրական է գնահատել այն փաստը, որ ԵԱՀԿ Մինսկի խումբը, լսելով հայկական կողմերի կոչերը, արդեն հասցեագրված գնահատականներով է հանդես գալիս:
«Բայց ես չեմ կարծում, թե այդ գնահականները բավարար են, դրանք միայն գործողությունների սկիզբն են: Պետք է հետեւեն նաեւ պատժամիջոցներ Ադրբեջանի նկատմամբ, եթե այդ երկիրը շարունակի նման ապակառուցողական քաղաքականությունը», - ընդգծել է Էդուարդ Շարմազանովը: Նա նշել է, որ սա շատ կարեւոր հայտարարություն է, քանի որ ԵԱՀԿ Մինսկի խմբի համանախագահ երկրները, որոնք նաեւ ՄԱԿ-ի Անվտանգության խորհրդի մշտական անդամներ են, ուղիղ ու հստակ իրերն իրենց անուններով կոչեցին: «Ամեն ինչ դրանից է սկսվում: Սա ակնհայտ ապտակ է Ադրբեջանի ապակառուցողական քաղաքականությանը: Մենք պետք է վճռական լինենք ու միավորենք մեր ջանքերը`ռազմական ու դիվանագիտական ճակատում: Այդ հայտարարությունները պետք է շարունակություն ունենան: Ինչ-որ առումով դա նաեւ ուշացած հայտարարություն էր: Ես դրական եմ գնահատում այն, որ Ռուսաստանն առաջին անգամ Մարիա Զախարովայի շուրթերով խոսեց այդ մասին: Մենք գիտենք, որ այսօր տարածաշրջանում նրա դերը շատ կարեւոր է», -նշել է Շարմազանովը: Շարմազանովի համոզմամբ`դա խոսում է այն մասին, որ Ադրբեջանը ձախողվում է դիվանագիտական ասպարեզում եւ բացի ռազմական արկածախնդրությունների դիմելուց նրան այլեւս ոչինչ չի մնում:
Հիշեցնենք, որ ԵԱՀԿ Մինսկի խմբի համանախագահները դատապարտել են արցախյան հակամարտության գոտու շփման գծում հրադադարի ռեժիմի վերջին խախտումները եւ կողմերին կոչ արել անհրաժեշտ միջոցներ ձեռնարկել հակամարտության գոտում հետագա լարվածությունը կանխելու համար:
«Բազմաթիվ հավաստի աղբյուրներից ստացված տեղեկատվության համաձայն, Ադրբեջանը մայիսի 15-ին շփման գծում հրթիռ է արձակել՝ ոչնչացնելով ռազմական տեխնիկա։ Մայիսի 16-ի երեկոյան եւ հաջորդ օրը հայկական զինված ուժերը պատասխանել են տարբեր տրամաչափի ականանետային կրակահերթերով։ Երկու կողմերի նման գործողությունները հրադադարի ռեժիմի զգալի խախտում եւ տագնապի առիթ են»,-ասվում է հայտարարությունում:
