Իրանի Իսլամական Հանրապետությունում այսօր անցկացվող նախագահական ընտրություններին քաղաքացիները բավականին ակտիվ են մասնակցում: Այս մասին NEWS.am-ին այսօր՝ մայիսի 19-ին, NEWS.am-ին տեղեկացրին Հայաստանում Իրանի Իսլամական Հանրապետության դեսպանատնից:
Նախագահական ընտրությունների քվերակությունը սկսվել է առավոտյան ժամը 06:00-ին եւ տեւելու է մինչեւ 18:00-ն: Դեսպանատնից տեղեկացրին, որ, եթե մասնակցության ակտիվությունը այսպես շարունակվի, ապա հնարավոր է, որ ընտրատարածքները ժամը 18:00-ին չփակվի եւ քվեարկության ժամն ավելանա:
Դեսպանատնից փոխանցեցին, որ Հայաստանում գտնվող իրանցիները եւս ակտիվ մասնակցություն են ցուցաբերում նախագահական ընտրություններին, Հայաստանում գտնվող 10 հազարից ավելի իրանցիներն ու իրանահայերը իրենց քվեարկությունը կատարում են Հայաստանում Իրանի Իսլամական Հանրապետության դեսպանատանը բացված ընտրական տարածքում:
Նշենք, որ ընտրություններին մասնակցելու դիմում է ներկայացրել 1636 թեկնածու, այդ թվում 137 կին։ Նրանցից է նաեւ Իրանի նախկին նախագահ Մահմուդ Ահմադինեժադը , որն անտեսել է թեկնածություն չառաջադրելու մասին Իրանի հոգեւոր առաջնորդ Ալի Համենեի խորհուրդը։
Ընտրապայքարի ֆավորիտ է համարվում Հասան Ռոհանին, որին ըստ հարցումների, պատրաստ է աջակցել ընտրողների 41․6 տոկոսը։ Նրան հաջորդում է այաթոլա Էբրահիմ Ռաիսին, որը կարող է ապավինել ձայների 26․7 տոկոսին։ Ամենաքիչ շանսերն ունեն մշակույթի նախկին նախարար Մոստաֆա Աղա Միրսալիմը (2,8%) ու արդյունաբերության նախկին նախարար Մոստաֆա Հաշեմի Տաբան (1,2%)։