Սինգապուրի ամենահին եկեղեցում, որն արդեն 182 տարեկան է, հայր Զավեն Յազիչյանը հայկական եկեղեցու ծիսակարգով ավանդական պատարագ է մատուցում:
Չնայած 36-ամյա հայր Զավենը Մյանմարում է ապրում, տարեկան հինգ կամ վեց անգամ գալիս է՝ Հիլ Սթրիթում գտնվող Սուրբ Գրիգոր Լուսավորիչ եկեղեցում պատարագ մատուցելու:
Ըստ «Strait Times»-ի՝ Սինգապուրի հայ համայնքը երբեք մեծ չի եղել. հայերի թիվը չի գերազանցել 100-ը, բայց հայկական եկեղեցին հոգեւորական չունի 1930-ական թվականներից: Սակայն հայկական եկեղեցու հավատացյալները թույլ չեն տալիս, որ այն անհետանա:
35-ամյա Անի Ումեդյանը եկեղեցու կամավորներից է արդեն 9 տարի: Նա ամուսնու հետ Հայաստանից Սինգապուր է փոխադրվել 2008 թվականին: Տիկին Ումեդյանը Հայկական ժառանգության համույթի անդամ է, որը 2009 թվականին է կազմավորվել եւ ամեն ինչ անում է՝ Սինգապուրում հայկական պատմությունն ու մշակույթը պահպանելու համար: Հայ երաժիշտներից կազմված համույթը, որոնք Սինգապուր են եկել վերջին տարիներին, պարբերաբար համերգներ է տալիս եւ միջոցառումներ կազմակերպում հայկական Սուրբ Գրիգոր Լուսավորիչ եկեղեցում: Տիկին Ումեդյանը նշում է. «Համերգների շնորհիվ բազմաթիվ օտարերկրացիներ սկսում են հետաքրքրվել հայկական մշակույթով»:
Նրա խոսքով, երբ սկսել է այցելել եկեղեցի, այստեղ շուրջ 20 մարդ կար: «Հիմա, երբ ավելի շատ միգրանտներ կան, հավատացյալների թիվն ավելին է, եւ մենք ուրախ ենք տեսնել, որ եկեղեցում 40-50 մարդ կա»,- ընդգծում է նա:
Հայր Զավենը համաձայն է: Հարցին, ի՞նչն է նրան մղում ամեն անգամ Սինգապուր հասնել եւ պատարագ մատուցել, հայր Զավենը պատասխանում է. «Կարեւոր է յուրաքանչյուր մարդ: Եթե անգամ հավատացյալները մի քանիսն են, իմ պարտքն է ծառայել նրանց»:
