Հայաստանի «Նոր քաղաքական մշակույթ» կուսակցության նախագահ Անի Զախարյան կողմից անցած տարվա հուլիսի 19-ին ոստիկանության մեքենայի ապակին կոտրելու հրահանգներ տալու գործով դատաքննությունն այսօր՝ մայիսի 22-ին, ավարտվեց:
Երեւանի Կենտրոն եւ Նորք-Մարաշ վարչական շրջանի դատարանում մինչեւ դատաքննության ավարտ հայտարարելը՝ Անի Զախարյանի պաշտպան Զորայր Հարությունյանը միջնորդություն ներկայացրեց լազերային սկավառակ դատարանում հետազոտելու եւ գործի նյութերին կցելու համար:
«Սկավառակում առկա տեսանյութով ապացուցվում է, որ իմ պաշտպանյալը դեպքի պահին եղել է իր մեքենայի մոտ կանգնած եւ ոչ մի հրահանգ չի հնչեցրել»,- ասաց պաշտպանը:
Չնայած մեղադրող Վահան Հարությանյանի առարկությանը՝ դատարանը բավարարեց միջնորդությունը եւ դատարանում ցուցադրվեցին այդ երկու տեսանյութերը: Հարցը, թե արդյոք այդ տեսանյութերը որպես ապացույց կներառվեն, դատավոր Վարդանյանը հայտնեց, որ այդ հարցը կքննարկվի խորհրդակցական սենյակում դատավճիռ կայացնելիս:
Դատարանը որոշեց դատաքննության ավարտ հայտարարել: Դատական հաջորդ նիստը կկայանա հունիսի 2-ին:
Ըստ մեղադրական եզրակացության` Անի Զախարյանը հուլիսի 19-ին ժամը 20-ի սահմաններում Երեւանի Խորենացի եւ Քրիստափոր խաչմերուկում ինքնաբուխ հանրահավաքի ընթացքում բարձրախոսով հնչեցրել է կոչեր եւ դրդել մի խումբ ինքնությունները չպարզված անձանց կոտրել եւ վնասել այդ պահին հիշյալ խաչմերուկում իր ծառայողական պարտքը կատարող ոստիկանության մեքենան, որի մեջ եղել են ոստիկանության ծառայողներ:
Անի Զախարյանին մեղադրանք է առաջադրվել Քրեական օրենսգրքի 38-185-րդ հոդվածի 2-րդ մասի 3-րդ կետով, այն է` ուրիշի գույքը դիտավորությամբ ոչնչացնելուն կամ վնասելուն դրդելը, որը կատարվել է՝ կապված անձի կամ նրա մերձավորի կողմից իր ծառայողական կամ հասարակական պարտքը կատարելու հետ: Խափանման միջոց է ընտրվել ստորագրություն չհեռանալու մասին: