Իրանի եւ Հայաստանի հարաբերությունների գրավականը էներգետիկ ոլորտն է, եւ պատահական չէ, որ արդեն կառուցվում է թվով երրորդ բարձրալիքային էլեկտրահաղորդիչների գիծը։ Այս մասին մայիսի 22-ին լրագրողների հետ հանդիպման ժամանակ հայտարարել է իրանագետ Վարդան Ոսկանյանը։
Նրա խոսքով՝ երկու երկրների հարաբերություններում առաջին հաջողությունները կապված են էներգետիկ ոլորտի հետ։ «Կարեւոր է նաեւ նոր հաղորդակցական ուղիների հաստատումը։ Իրանը Հայաստանը դիտարկում է որպես կարեւոր ճանապարհային գոտի, եւ մենք հնարավորինս արագ պետք է իրականցնենք դրա բաղադրիչ տարրերից մեկը՝ «Հյուսիս-հարավ» մայրուղու կառուցումը՝ օգտվելով հանգամանքից, որ իրանա-ադրբեջանական երկաթգիծը չի կառուցվում, քանի որ չի հատկացվել Ադրբեջանի կողմից խոստաված գումարը։ Եւ քանի որ, այդ գումարը խոստացած ադրբեջանական բանկը սնանկացել է, նախագիծը կախված է օդից», - նշել է Ոսկանյանը։ Ըստ նրա՝ հայկական կողմի համար այս առումով նոր հնարավորություններ են բացվել։ «Մենք պետք է կարողանան օգտվել պահից՝ Հայաստանն ու Իրանը միմյանց կապող երկաթգծի կառուցման համար քայլեր ձեռնարկելով», - հավելել է Վարդան Ոսկանյանը։