Անցյալ շաբաթ Նյու Յորքի կենտրոնում տեղի ունեցած վթարի հետեւանքով կանադահայ է տուժել՝ 38-ամյա Ելենա Ավետիսյանը: GoFundMe-ում նրա ազգականուհին գրել է, որ կինը Նյու Յորք էր գնացել՝ հարսանիքի:
«Զարմուհիս՝ Ելենա Ավետիսյանը, պայքարում է կյանքի համար: 2017 թվականի մայիսի 18-ին Թայմս Սքվերում խելագարի մեքենան վրաերթի ենթարկեց նրան: Նա Նյու Յորք էր եկել իմ հարսանիքին: Որոշեց Թայմս սքվեր գալ՝ չմտածելով, որ այդ զբոսանքն ընդմիշտ կփոխի նրա կյանքը»,- գրել է Աննան Բրուքլինից:
Ըստ Slavicsac-ի՝ նա նաեւ նշել է, որ Ելենան ապրում է կանադական Քվեբեկի Մոնրեալ քաղաքում, «երեք հիասքանչ դուստրեր ունի»:
«Հիմա նա ծայրահեղ վիճակում է (կոմայի մեջ): Նրա քույրն ու ամուսինը նրա կողքին են: Նրանք ստիպված են անընդհատ Նյու Յորքի եւ Կանադայի միջեւ թռչել, որպեսզի հոգ տանեն երեխաների մասին»,- նշել է տուժածի զարմուհին:
Հիշեցնենք, որ դեպքը տեղի է ունեցել մայիսի 18-ին: Ականատեսների խոսքով՝ կարմիր «Հոնդա»-ն սրընթաց մխրճվել է մարդկանց բազմության մեջ, այնուհետեւ բախվել սյուներին ու կիսով չափ շրջվել: Պատահարի հետեւանքով մեկ մարդ զոհվել է, 22-ը՝ վիրավորվել:
