ԱՄՆ Ֆլորիդա նահանգի Տամպա քաղաքի բնակիչը ձերբակալվել է իր հարեւանների սպանության մեղադրանքով։ 18-ամյա մուսուլման Դեւոն Արթուրսը սպանել է հարեւաններին, որոնց նա «նեոնացիստներ» է անվանել, որովհետեւ վերջիններն անհարգալից են վերաբերվել իր կրոնին, հաղորդում է Americaru-ն։
Տամպայի ոստիկանությունը հաղորդում է, որ տղամարդը խոստովանել է իր երկու հարեւանների սպանությունը, որոնց հետ սենյակ էր կիսում։ Նրան մեղադրանք է առաջադրվել սպանության, ծանրացուցիչ հանգամանքներում հարձակման եւ զինված առեւանգման համար։
Մայիսի 19-ին Արթուրսը մտել է Տամպայում գտնվող Green Planet Smoke Shop խանութ՝ զինված սեւ, կիսաավտոմատ ատրճանակով։ Նա պահանջել է, որ աշխատակիցները եւ մեկ հաճախորդը գետնին պառկեն։ Ականատեսների խոսքով՝ Արթուրսը բղավել է իր պատանդների վրա ու սպառնացել սպանել։ Մի քանի րոպե անց խանութ է մտել եւս մեկ մարդ, ում եւս նա ստիպել է պառկել հատակին։
«Արթուրսը խանութում բոլոր երեք պատանդներին հայտնել է, թե ինքն արդեն սպանել է ինչ-որ մեկին։ Նա նաեւ այդ մարդկանց ասել է, որ զայրացած է ԱՄՆ-ի՝ մուսուլման երկրները ռմբակոծելու պատճառով»,-ասվում է ոստիկանության հաշվետվությունում։
Համաձայն արձանագրության՝ Արթուրսին համոզել են բաց թողնել պատանդներին, որից հետո նա հանձնվել է։ Ոստիկանական ավտոմեքենայում Արթուրսը հիշատակել է Մուհամեդին ու ասել, որ «պետք է դա աներ»։ Նա նաեւ ասել է, որ բնակարանում կան երկու սպանվածներ։
Ոստիկանությունը հայտնաբերել է նրա երկու հարեւանների մարմինները՝ 22-ամյա Ջերեմի Հիմելմանի եւ 18-ամյա Անդրեյ Օնիշչուկի։ Արթուրսը նրանց հրացանով է սպանել։ Նրա խոսքով՝ նրանք նեոնացիստներ էին, ինչպես ինքը՝ մինչ իսլամ դավանելը։ Նա սպանել է նրանց, քանի որ չեն հարգել իր հավատքը։
Արթուրսի մյուս հարեւանը՝ Բրենդոն Ռասելը, եւս ձերբակալվել է մայիսի 21-ին՝ բնակարանում հայտնաբերված պայթուցիկ սարքերի հետ կապ ունենալու պատճառով։
