Լոնդոնում ներդրողների հետ բանակցություններ են ընթանում Ադրբեջանի Միջազգային բանկի (ԱՄԲ) 3,3 մլրդ դոլար արտաքին պարտքի վերակառուցման շուրջ: Այս մասին հայտնում են ադրբեջանական լրատվամիջոցները:
Տեղեկությունների համաձայն՝ բանակցությունները կանցկացվեն White & Case LLP միջազգային իրավաբանական ընկերության գրասենյակում: Այս ընկերությունն իրավաբանական օգնություն է ցուցաբերում պետությունների, ներդրողների եւ ֆինանսական ինստիտուտների միջեւ վեճերի կարգավորման համար:
ԱՄԲ-ն դիմել է Նյու Յորքի դատարան բանկի արտասահմանյան պարտավորությունների վերակառուցման գործընթացը ճանաչելու եւ արտասահմանյան ներդրողների կողմից ԱՄԲ-ի ակտիվների նկատմամբ օտարերկրյա ներդրողների կողմից դատական հայցերը կանխելու նպատակով: Միջազգային բանկի վարկատուներն են Եվրոպայի եւ ԱՄՆ-ի մի շարք առաջատար ֆինանսական ինստիտուտներ: ԱՄԲ-ն վարկային պարտավորություններ ունի ընդամենը 37 ներդրողի հանդեպ: Միջազգային բանկի ամենախոշոր ներդրողը CargillFinancial Services International Inc ներդրումային ընկերությունն է:
Եթե ներդրողների հետ բանակցությունները հաջող ընթացք ունենան, ապա բանկի արտաքին պարտքը կփոխանցվի ադրբեջանական պետությանը: Սակայն նման որոշումը պետք է ընդունվի ներդրողների մեծամասնության կողմից:
The Wall Street Journal-ը հայտնել է, որ պարտքի վերակառուցման մասին հայտարարությունը եւ սնանկության մասին Նյու Յորքի դատարանին Միջազգային բանկի դիմելը ներդրողների համար անակնկալ է եղել:
Ներդրողների հետ բանակցելու համար Լոնդոն մեկնած պատվիրակության կազմը հայտնի չէ: Սակայն սպասվում է, որ այն կգլխավորի Ադրբեջանի ֆինանսների նախարար Սամիր Շարիֆովը: Բանակցությունների ընթացքում բանկի խորհրդատուներն են White & Cas եւ Lazard Freres ընկերությունները:
