Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանում այսօր՝ մայիսի 23-ին, «Երրորդմասցի Լյովիկի» եւ ընկերների սպանության գործով դատական նիստին պետք է հարցաքննվեին տուժող կողմի իրավահաջորդները, սակայն, նրանք դատարան չէին ներկայացել: Դատախազը միջնորդություն էր ներկայացրել հրապարակել տուժող կողմի իրավահաջորդների նախաքննական ցուցմունքները, որը դատարանը մերժեց: Դատարանը որոշում կայացրեց անցնել ամբաստանյալների հարցաքննությանը, սակայն, ամբաստանյալների շահերի պաշտպան Լուսինե Սահակյանը միջորդեց դատական նիստը հետաձգել, քանի որ պաշտպանական կողմը պատրաստ չէր հարցաքննությանը: Դատարանը պաշտպանի միջնորդությունը բավարարեց, որն առաջացրեց դատական նիստին ներկա գտնվող Լեւոն Ղազարյանի մոր զայրույթը: Նա դատարանին մոտենալով նշեց. «Էս ինչ խաղեր եք տալիս, պաշտպանում եք էս մարդասպաններին, քիլլերներին»: Ամբաստանյալներից Վահան Հակոբյանն էլ տեղից հակադարձեց` «Էս ինչ շառեր եք անում, ով է մարդասպանը»: 

Հաջորդ դատական նիստը տեղի կունենա մայիսի 30-ին:

Ըստ մեղադրական եզրակացության՝ Վահան Հակոբյանը («Գաստիկ»), Սարգիս Հախանումյանն («Տլե») ու Սարգիս Գրիգորյանը («Ծգլ») նախնական համաձայնությամբ ապօրինի ձեռք են բերել եւ պահել զենք:

2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը եւ Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու եւ ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգներից կրակահերթ են արձակել Լեւոն Ղազարյանի, Դրաստամատ Թադեւոսյանի եւ Մեսրոպ Նազարյանցի ուղղությամբ: Կրակոցների հետեւանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադեւոսյանը «Էրեբունի» բժշկական կենտրոն տեղափոխվելու ճանապարհին մահացել են:

Նրանց մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 1, 6, 7 կետերով: Խափանման միջոց է ընտրվել կալանավորումը: