Ադրբեջանն իր ռազմաքաղաքական ղեկավարությամբ անկանխատեսելի, արկածախնդիր հակառակորդ է: Մայիսի 23-ին լրագրողների հետ հանդիպմանն այս մասին հայտարարեց ՀՀ պաշտպանության նախարարության պաշտպանական քաղաքականության վարչության պետ Լեւոն Այվազյանը:
Նա հիշեցրեց, որ ԵԱՀԿ Մինսկի խումբն առաջին անգամ հասցեական հայտարարությամբ հանդես եկավ՝ կապված ղարաբաղյան հակամարտության գոտում հրադադարի ռեժիմի խախտման հետ:
«Քաղաքական տեսանկյունից դա շատ կարեւոր է: Կարծում եմ՝ նման հայտարարություններ, որոնք մեր հարեւանին կոչ են անում զերծ մնալ նման գործողություններից, դեռ շատ կլինեն»,- նշեց Այվազյանը:
Ինչ վերաբերում է հակառակորդի կողմից հրադադարի ռեժիմի պարբերական խախտումներին, նա նշեց, որ դեպքերի մեծ մասի պարագայում դրանք պայմանավորված են անտրամաբանական պատճառներով՝ ուղղված շփման գծում իրադրության սրմանը:
«Շփման գծի տարբեր հատվածներում կան հրամանատարներ, որոնք ռազմական տեսանկյունից անտրամաբանական գործողություններ են կատարում: Իհարկե՝ այդ խախտումները որեւէ ռազմական խնդիր չեն լուծում: Դրանք ընդամենն ուղղված են լարված իրադրության պահպանմանը, հայ հասարակության վրա հոգենական ճնշում գործադրելուն եւ խնդրին միջազգային հանրության ուշադրությունը գրավելուն: Այդպիսին է մեր հարեւանի քաղաքականությունը»,- հավելեց Լեւոն Այվազյանը:
Հիշեցնենք, որ ԵԱՀԿ Մինսկի խմբի համանախագահները դատապարտել են ղարաբաղյան հակամարտության գոտու շփման գծում հրադադարի ռեժիմի վերջին խախտումները եւ կողմերին կոչ են արել անհրաժեշտ քայլեր ձեռնարկել՝ հակամարտության գոտում իրադրության հետագա սրումը կանխելու համար: «Բազմաթիվ հավաստի աղբյուրներից հավաքված տեղեկատվության համաձայն՝ Ադրբեջանը մայիսի 15-ին շփման գծում հրթիռ է արձակել՝ ոչնչացնելով ռազմական տեխնիկա։ Մայիսի 16-ի երեկոյան եւ հաջորդ օրը հայկական զինված ուժերը պատասխանել են տարբեր տրամաչափի ականանետային կրակահերթերով։ Երկու կողմերի նման գործողությունները հրադադարի ռեժիմի զգալի խախտում եւ տագնապի առիթ են»,- ասված է եռանախագահների հայտարարությունում: