Քրեական հեղինակություն Բալահմեդ Բալահմեդովը՝ հայտնի որպես Յաշա Բակինսկի, սպանվել է Բաքվում՝ սեփական տանը։ Այս մասին հաղորդում է «Sputnik-Ադրբեջան»-ը՝ վկայակոչելով դատախազությունը։
Գործակալությունը հաղորդում է, որ 65-ամյա Բալահմեդովի սպանության մեղադրանքով ձերբակալվել է նրա հեռավոր ազգական, նախկինում երեք անգամ դատապարտված Էլհան Աղաեւը (1976 թվականին ծնված)։ Տղամարդկանց միջեւ վեճը ծագել է մոտ երկու ամիս առաջ։ Աղաեւը կասկածել է քրեական աշխարհում Բալահմեդովի հեղինակության հարցում, ինչի համար Յաշա Բակինսկին նրան դանակահարել է։
«Աղաեւը որոշել է վրեժխնդիր լինել։ Մայիսի 22-ին համարձակության համար ոգելից խմիչք խմելով՝ նա եկել է Բալահմեդովի տուն եւ հենց անկողնում մորթել նրան։ Նշվում է, որ սպանության պահին տանը Բալահմեդովից բացի գտնվել են նաեւ նրա ընտանիքի անդամները»,-նշում է գործակալությունը։
Բալահմեդովը ճաղերի հետեւում անցկացրել է ընդհանուր առմամբ 38 տարի։ Որոշ տվյալներով՝ առաջին անգամ նա դատապարտվել է կնոջը սպանելու մեղադրանքով։ Նա թագադրվել է որպես օրենքով գող, սակայն հետո զրկվել այդ տիտղոսից։