Աշխարհի ուշադրությունն այսօր կենտրոնացել է Մեծ Բրիտանիայի ուղղությամբ: Մանչեսթերում երեկ երեկոյան տեղի ունեցած ահաբեկչությունը 22 մարդու կյանք է խլել, 59 մարդ վիրավոր է, եւս 5-ն անհետ կորած է համարվում: Զոհերի թվում նաեւ երեխաներ կան: Ահաբեկչությունն իրականացվել է «Մանչեսթեր Արենա»-ի մուտքի մոտ, ամերիկացի երգչուհի Արինա Գրանդեի համերգից հետո: Բրիտանական իշխանությունները ողբերգությունն ահաբեկչություն են որակել, իսկ «Իսլամական պետություն» խմբավորումն արդեն ստանձնել է կատարվածի պատասխանատվությունը:
Հայտնի է, որ ահաբեկչությունը մահապարտ է իրականացրել: Նա պայթուցիկ սարքը գործի է դրել, երբ համերգի ավարտից հետո մարդիկ սկսել են դուրս գալ «Մանչեսթեր Արենա»-ից: Ու թեեւ հաղորդվել էր, որ մահապարտը միայնակ է գործել եւ նույնպես մահացել է, տեղեկություն է հրապարակվել, որ ոստիկանությունը 23-ամյա տղամարդու է ձերբակալել: Լրատվամիջոցները նույնիսկ նրա անունն են նշել՝ Սալման Աբեդի: Նրա քաղաքացիության մասին, սակայն, առայժմ ոչինչ չի հաղորդվում:
Հավելենք, որ սա խոշորագույն ահաբեկչությունն է 2005 թվականին Լոնդոնի մետրոյում իրականացված պայթյուններից հետո, որոնք 50 մարդու կյանք խլեցին: Միջազգային հանրությունը դատապարտել է Մանչեսթերում իրականացված ահաբեկչությունը: Իսկ Փարիզի քաղաքապետը որոշում է կայացրել կեսգիշերին մարել Էյֆելյան աշտարակի լույսերը՝ ի հիշատակ ողբերգության զոհերի:
«Արաբկիր» բժշկական կենտրոնում երկու տարեկան երեխա է մահացել: Տղան առողջական խնդիրներ է ունեցել, Երեւան է տեղափոխվել Գյումրիի Ավստրիական բժշկական կենտրոնից: Երեխայի ծնողները ոստիկանություն են դիմել՝ փոքրիկի մահվան համար մեղադրելով բժիշկներին: Կարծում են, որ տղային անհրաժեշտ բուժօգնություն չի ցուցաբերվել: Դատաբժշկական փորձաքննություն է նշանակվել: «Արաբկիր» բժշկական կենտրոնից մեր թղթակցին տեղեկացրել են, որ մահացած տղան սրտի բնածին արատ է ունեցել՝ արյունատար անոթի նեղացում: Երեւան տեղափոխելուց հետո երեխային անմիջապես վերակենդանացման բաժանմունք են տարել, բայց 15-20 րոպե անց նա սրտի կանգի հետեւանքով մահացել է:
Ոստիկանները հայտնաբերել են Հրազդանում նորածնի դին փողոցում թողած կնոջը: Բերման է ենթարկվել Հրազդանի 40-ամյա մի բնակչուհի: Նա խոստովանել է, որ մայիսի 11-ի առավոտյան իր բնակարանի զուգարանում, առանց բժշկական օգնության, տղա երեխա է լույս աշխարհ բերել: Կինը վստահեցրել է, որ ճիչ արձակելուց հետո փոքրիկը մահացել է: Նորածնի դին փաթեթավորել է պոլիէթիլենային տոպրակով, դրել թղթե տուփի մեջ, ապա տեղափոխել Հրազդանի անտառային կանաչապատ տարածքներից մեկն ու հեռացել:
Քննչական կոմիտեն, սակայն, սպանության մեղադրանքով քրեական գործ է հարուցել: Իրավապահները պարզել են, որ ծննդաբերելուց հետո մայրը երեխային լոգարանում է թողել՝ առանց խնամքի եւ կերակրելու: Ըստ տեղեկությունների՝ 40-ամյա կինը երկար տարիներ ամուսնալուծված է, երկու անչափահաս երեխա ունի՝ որդի եւ դուստր:
Հովհաննես Հովսեփյանը նորից կղեկավարի նախագահի վերահսկողական ծառայությունը: Նա այս պաշտոնում աշխատել է նաեւ 2008-2016 թվականներին, իսկ 2016-ի մարտից նշանակվել է պետեկամուտների կոմիտեի նախագահ: Այստեղ, սակայն, ընդամենը մի քանի ամիս է աշխատել: Կարեն Կարապետյանի՝ կառավարությունը ձեւավորելուց հետո Հովսեփյանն ազատվել է պաշտոնից, նրան փոխարինել է Վարդան Հարությունյանը: Հովհաննես Հովսեփյանը մի շարք պետական պարգեւների է արժանացել:
Կինոարտադրությունը Կարեն Կարապետյանի ուշադրության կենտրոնում է. այսօր վարչապետը մշակույթի նախարարությունում է եղել: Փոխնախարար Արթուր Պողոսյանը ներկայացրել է Հայաստանի կինոարտադրության ոլորտում առաջարկվող բարեփոխումները: Անհրաժեշտ են համարում կինոարտադրության կառավարման ժամանակակից մոդելի համար իրավական հիմքեր ապահովել, «Շրջիկ կինոթատրոն» ծրագիր իրականացնել, մարզային կինոթատրոնների ցանց ստեղծել: Վարչապետը հանձնարարել է կինոարտադրության զարգացման ծրագիր մշակել ու կրկին շեշտել. հիմքում տրամաբանություն պետք է լինի:
Կարեն Կարապետյանը խնդիր է համարում նաեւ Երեւանում ու մարզերում երեխաների մշակութային ժամանցի կազմակերպումը: Ոլորտի պատասխանատուները պետք է առաջարկներ ներկայացնեն, կառավարությունն էլ, հնարավորության դեպքում, կփորձի ֆինանսապես աջակցել:
Ամերիկյան արժույթը շարունակում է թուլանալ, իսկ եվրոյի աճը չի դադարում: Արդյունքում դոլարի փոխարժեքն այսօր կազմել է 482 դրամ, եվրոյինը՝ 543, ռուբլունը՝ 8 դրամ 53 լումա, ֆունտինը՝ 626 դրամ:
Մայիսի 24-ին հանրապետության շրջանների մեծ մասում ժամանակ առ ժամանակ տեղումներ են սպասվում, հյուսիսային շրջաններում՝ ամպրոպ: Երեւանում նույնպես առանձին հատվածներում կարճատեւ տեղումներ կլինեն: Մայրաքաղաքում գիշերը կդիտվի +10+12, ցերեկը՝ +23+25 աստիճան տաքություն: