Անցած տարվա ապրիլին Կոտայքի մարզի ռեստորաններից մեկում պայթյունի մասին կեղծ ահազանգ տալու մեջ մեղադրվող Գեւորգը դատապարտվեց 1 տարվա ազատազրկման:
Ըստ մեղադրական եզրակացության` Գեւորգը, չցանկանալով, որ ընկերուհին մասնակցի մորաքրոջ որդու հարսանիքին, խանդի շարժառիթից դրդված, զանգահարել է ոստիկանություն եւ տվել նախապատրաստվող ահաբեկչության մասին սուտ հաղորդում` հայտնելով, թե իբր Կոտայքի մարզի Ջրվեժ գյուղում գտնվող ռեստորաններից մեկում պայթյուն է տեղի ունենալու:
Դատարանում Գեւորգն իրեն մեղավոր է ճանաչել եւ հայտարարել է, որ զղջում է կատարվածի համար:
Առաջին ատյանի դատարանը Գեւորգին մեղավոր է ճանաչել Քրեական օրենսգրքի 259-րդ հոդվածով (ահաբեկչության մասին սուտ հաղորդում տալը) եւ դատապարտել 1 տարվա ազատազրկման:
Նշենք, որ Գեւորգը 2016թ. դեկտեմբերից գտնվում է կալանքի տակ:
Ավելի վաղ հայտնել էինք, որ 2016թ. ապրիլի 16-ին ուշագրավ դեպք էր տեղի ունեցել Հանրապետության ռեստորաններից մեկում: Անհայտ անձը զանգահարել էր իրավապահ մարմիններին ու հայտնել, որ ռեստորանի հանդիսության սրահում հարսանիքի ժամանակ պայթյուն էր լինելու։ Համապատասխան միջոցառումներ ձեռնարկելուց հետո պարզվել է, որ կեղծ ահազանգ է եղել։