Ընթացիկ տարվա առաջին 4 ամիսներին Հայաստանում 5,7 տոկոս տնտեսական ակտիվություն է գրանցվել: Մայիսի 24-ին՝ լրագրողների հետ հանդիպման ժամանակ այս մասին ասաց Լեւոն Տեր-Պետրոսյանի կառավարման տարիներին Կենտրոնական բանկի նախագահ, տնտեսագետ Բագրատ Ասատրյանը:
Նրա խոսքով՝ սա դրական երեւույթ է, սակայն խորհրդարանական ընտրություններում տեղի ունեցածը ամեն ինչ մթագնում է: «Այն, ինչ իշխանությունն արեց, խայտառակություն է: Սերժ Սարգսյանը պետք է բռունցքը սեղանին խփեր եւ ասեր, որ եւս մեկ ժամկետ կիշխանավարի, այլ ոչ թե դիմեր ինչ-որ ստվերային քայլերի»,- նշեց Ասատրյանը:
Տնտեսագետն այնուհետեւ հավելեց, որ Հայաստանը շարունակում է մնալ տոտալ կոռումպացված երկիր: «Իսկ սա նշանակում է՝ դժվար է պատկերացնել երկրի տնտեսական զարգացումը»,- եզրակացրեց ընդդիմադիրը:
