Հեռուստատեսային հանրահայտ «Գահերի խաղը» սերիալից գայլի մահվան մասին հաղորդագրությունը, որը հայտնվել է գրող Ջորջ Մարտինի (սերիալի հիմքում դրված գրական շարքի հեղինակը) թվիթերյան էջում, թյուրըմբռնման պատճառ է դարձել. պարզվել է, որ գրողը նկատի չի ունեցել այն գայլին, որը նկարահանվել է Game of Thrones-ում, այլ մեկ ուրիշ գայլի, փոխանցում է Planet-today-ը:
Ամեն ինչ սկսվել է այն ժամանակ, երբ Ջորջ Մարտինը սպիտակ գայլի հետ լուսանկար է հրապարակել եւ գրառում կատարել. «Ի հիշատակ իրականում գոյություն ունեցած, Ուրվական անունով Wild Spirit Wolf արգելոցի գայլի: Այս շաբաթ կենդանին կյանքից հեռացավ»:
Անմիջապես հայտնվել են «Գահերի խաղի» սրտնեղված երկրպագուների մեկնաբանությունները, որոնք ահռելի թվով ցավակցական հաղորդագրություններ են թողել:
Մարդիկ մտածել են, որ սատկել է սերիալում Ուրվականին մարմնավորած կենդանին, սակայն պարզվել է, որ սա ուրիշ Ուրվական է:
«Մեզ լքեց գայլը, որին փրկել էին Wild Spirit Wolf արգելոցի աշխատակիցները եւ նրան Ուրվական էին անվանել «Գահերի խաղի» գայլի պատվին: Մի խոսքով՝ սա այն գայլը չէ, որը նկարահանվել է սերիալում»,- մի փոքր ավելի ուշ հստակեցրել է գրողը:
Այս ընթացքում աշխարհը պատրաստվում է Game of Thrones-ի յոթերորդ եթերաշրջանի թողարկմանը՝ առաջին սերիան եթերում կհայտնվի հուլիսի 16-ին: