ԱՄՆ-ում նոր «դիզելային սկանդալ» է հասունանում: Երկրի իշխանությունները դատական հայց են ներկայացրել Fiat Chrysler ընկերության դեմ: Ավտոարտադրողին մեղադրում են մեքենաներում անօրինական ծրագրային ապահովում տեղադրելու մեջ: Այն պաշտոնական ստուգումների ժամանակ վնասակար արտանետումների նվազեցված ցուցանիշներ է ներկայացնում:
Ըստ NTDTV-ի՝ անօրինական ծրագրային ապահովումը տեղադրվել է 104 հազար դիզելային ավտոմեքենաների վրա: Խոսքը 2014-2016 թվականների արտադրության Dodge Ram 1500 եւ Jeep Grand Cherokee մոդելների մասին է:
Հայցը քննելու է Դեթրոյթի դատարանը: Դրանում ԱՄՆ կառավարությունը պահանջում է շտկել կեղծ ծրագրային ապահովումն ու այլեւս այն չտեղադրել նոր մեքենաներում:
Եթե դատարանն ավտոարտադրողին մեղավոր ճանաչի, կարող է 4 մլրդ 600 մլն դոլարի տուգանք նշանակվել:
Երկրի իշխանությունները, սակայն, խնդրի խաղաղ կարգավորման հույս ունեն, ինչպես դա տեղի ունեցավ Volkswagen կոնցեռնի պարագայում: 2015 թվականի սեպտեմբերին ԱՄՆ շրջակա միջավայրի պահպանության գործակալությունը գերմանական արտադրողին նույնպես կեղծ ծրագրային ապահովում տեղադրելու մեջ էր մեղադրել եւ պահանջել հետ կանչել շուրջ կես միլիոն մեքենա:
Կոնցեռնի ղեկավարությունն ընդունեց մեղքն ու հաղորդեց, որ ամբողջ աշխարհում 11 մլն նման ավտոմեքենա է վաճառվել: Դրանք թողարկվել են Volkswagen, Audi եւ Skoda մակնիշներով: Ավտոհսկան շուրջ 25 մլրդ դոլարի փոխհատուցում վճարեց հաճախորդներին եւ ԱՄՆ իշխանությունների հետ կոնֆլիկտը հարթելու համար:
Մինչ այդ, Fiat Chrysler-ն առայժմ հերքում է մեղքը: Հայցի մասին հրապարակումից անմիջապես հետո ընկերության բաժնետոմսերի արժեքը նվազել է 3%-ով, իսկ ավելի ուշ՝ եւս 2.4%-ով: