Հայաստանի ստանդարտների ազգային ինստիտուտը մշակել է կոնյակի սպիրտի իսկության իզոտոպային անալիզատորի գործարկման համապատասխան մեթոդիկա։ Այս մասին մայիսի 24-ին լրագրողների հետ հանդիպման ժամանակ հայտնել է ՀՀ տնտեսական զարգացման եւ ներդրումների փոխնախարար Էմիլ Տարասյանը՝ պատասխանելով լրագրողների այն հարցին, որ տվյալ սարքի կիրառման հետ կապված խնդիրներ են ծագել։
Էմիլ Տարասյանը չի կարողացել պատասխանել հարցին, թե արդյո՞ք տվյալ սարքավորումը գործածվում է, թե ոչ։ «Գործարկման հետ կապված ես տեղեկություն չունեմ, սակայն ստանդարտը, որին դիմել են այդ սարքը գործածելու համար, մշակվել ու ներկայացվել է», - ասել է նա։
Անալիզի համար սարքավորումը ( միջուկային – մագնիսային ռեզոնատորը) ձեռք է բերվել Ռուսաստանի աջակցությամբ ու տեղադրված է Սննդամթերքի անվտանգության պետական ծառայությունում։
C2 եւ H13 իզոտոպերի անալիզով կարելի է բացահայտել խաղողի ծագումը ու ստուգել՝ արդյոք կոնյակը, գինին կամ խաղողի օղին պատրաստված են եղել տեղական հումքից ու հայկական կոչվելու իրավունք ունեն։
Ավելի վաղ NEWS.am-ի թղթակցին Գյուղնախի սննդամթերթի անվտանգության հարցերով պետական տեսչության ղեկավար Իշխան Կարապետյանն ասել է, որ Հայաստանում արդեն կա կոնյակի սպիրտի իսկության անալիզատոր, բայց փորձաքննությունը դեռ պարտադիր չէ կոնյակի հավաստագրման համար։ «Կոնյակի սպիրտի կամ գինու իսկությունը հաստատող փորձաքննության պահանջը դեռ պարտադիր չէ։ Սահմանել նման պահանջ, թե ոչ, նախարարությունը պետք է որոշի»,- հայտնել է Կարապետյանը։
