Փորձագետների կանխատեսումներով արդեն 2017-ին Գերմանիան կկարողանա առաջին անգամ առաջ անցնել Մեծ Բրիտանիայից որպես Եվրոպայի գլխավոր ներդրումային հարթակ, գրում է գերմանական Sueddeutsche Zeitung թերթը։ Առայժմ 2016-ի տվյալներով օտարերկրյա կոնցեռնները ավելի շատ Մեծ Բրիտանիայում են ներդրումներ արել։
Ernst & Young աուդիտորական ընկերության գերմանական բաժանմունքի ղեկավար Հուբերտ Բարտը վստահ է, որ շուտով, մասնավորապես 2017-ի ընթացքում, այդ վարկանիշը կփոխվի։ «Շատ բան է վկայում այն մասին, որ այս տարի Գերմանիան կզբաղեցնի Մեծ Բրիտանիայի տեղը որպես Եվրոպայի գլխավոր ներդրումային հարթակ»,- ասում է նա։
Նրա խոսքով, գալիք Բրեքսիթը ու Միացյալ թագավորության համար դրա բացասական հետեւանքները դեռ չեն հասցրել անդրադառնալ 2016-ի վարկանիշի վրա, առավել եւս որ հանրաքվեն կայանացել է հունիսի վերջին ու միայն մի քանի ամիս առաջ է վերջնականապես հասկանալի դարձել, որ Մեծ Բրիտանիան անցկացնելու է Բրեքսիթի կոշտ տարբերակը։ «Ընկերությունները ստիպված կլինեն պատրաստվել դրան,- շեշտել է Բարտը,- Արդյունքում շատ օտարեկրյա կոնցեռններ ներդրումներ կանեն այլ երկրներում»։
Մինչդեռ դեռ նոյեմբերին Ernst & Young-ը հարցում է իրականացրել միջազգային կոնցեռնների թոփ մենեջերների շրջանում՝ իրենց ընկերությունների համար «Բրեքսիթի» զանազան հետեւանքների թեմայով։ Պարզվում է, որ յուրաքանչյուր յոթերորդ ընկերությունը հիմամ տածում է Մեծ Բրիտանիայից հեռանալու մասին, ընդ որում որպես տեղափոխման հավանական վայր հենց Գերմանիան են նշում, հավելում է Sueddeutsche Zeitung-ը ։