Հայաստանի Վճռաբեկ դատարանը վարույթ չի ընդունել Ադրբեջանի հետախուզական ծառայություններին հավաքագրվելու մեջ մեղադրվող Կարինե Ղումաշյանի շահերի պաշտպանի բողոքը: Վճռաբեկ բողոք են ներկայացրել ամբաստանյալ Կարինե Ղումաշյանը եւ նրա պաշտպանը` խնդրելով բեկանել Առաջին ատյանի դատարանի` 2016 թվականի օգոստոսի 10-ի դատավճիռը եւ այն անփոփոխ թողնելու մասին Վերաքննիչ դատարանի՝ 2017 թվականի հունվարի 17-ի որոշումը, Կարինե Ղումաշյանին ՀՀ քրեական օրենսգրքի 299-րդ հոդվածի 1-ին մասով առաջադրված մեղադրանքում ճանաչել անպարտ եւ արդարացնել` նրա արարքում հանցակազմի բացակայության հիմքով։
Նշենք, որ Առաջին ատյանի դատարանը Կարինե Ղումաշյանին մեղավոր էր ճանաչել ՀՀ ՔՕ 299-րդ հոդվածի 1-ին մասով՝ պետական դավաճանություն եւ դատապարտվել 14 եւ 12 տարվա ազատազրկման:
Բացի Կարինե Ղումաշյանից, այս գործով անցնում են Ռաֆիկ Պապոյանը, Սերգեյ Պապոյանը:
Ռաֆիկ Պապոյանի որդին՝ Սերգեյ Պապոյանը, որը նույնպես մեղադրվում էր պետական դատավաճանության մեջ, անմեղ էր ճանաչվել եւ ազատ արձակվել: Սակայն, դատախազը Վերաքննիչ բողոք էր ներկայացրել՝ նրան արդարացնելու հիմքերը բավարար չհամարելով: Վերաքննիչ դատարանը բավարարել է դատախազի բողոքը եւ գործը ուղարկել ստորադաս դատարան՝ կրկին քննելու:
Կարինե Ղումաշյանին մեղադրանք էր առաջադրվել այն բանի համար, որ նա, բնակվելով Թուրքիայում, ընկել է այդ երկրի տարածքում գործունեություն ծավալած Ադրբեջանի հետախուզական ծառայությունների տեսադաշտը եւ 2013թ. հավաքագրվել այդ ծառայությունների աշխատակիցը հանդիսացող Արման անունով ներկայացած անձնավորության կողմից: Ստանալով վարձատրություն` ընդհանուր մոտ 1500 ԱՄՆ դոլար գումարի չափով, ստացել է առաջադրանք` կիրառելով գաղտնապահության կանոնների պահպանման մեթոդները` Հայաստանի տարածքից չզանգահարել Արման անունով ներկայացած անձին եւ այդ ծանոթության մասին ոչ մեկին չհայտնել:
Ռաֆիկ Պապոյանին մեղադրանք էր առաջադրվել այն բանի համար, որ նա բնակվելով Թուրքիայում, հավաքագրվել է այդ երկրի տարածքում գործունեություն ծավալած, Ադրբեջանի հետախուզական ծառայությունների աշխատակիցը հանդիսացող, Սեյրան անունով ներկայացած անձի կողմից եւ կատարել այդ հետախուզական ծառայության առաջադրանքները` Հայաստանից Թուրքիա ժամանած ՀՀ քաղաքացիների միջից ընտրել Ադրբեջանի հետախուզական ծառայությունների համար հետաքննություն ներկայացնող անձանց ու հավաքագրման նպատակով ծանոթացնել նրա հետ:
Սերգեյ Պապոյանին մեղադրանք էր առաջադրվել այն բանի համար, որ նա Թուրքիայում բնակվող հոր` Ռաֆիկ Պապոյանի ուղղորդմամբ, Վրաստանի Թբիլիսի քաղաքում հանդիպել է Ադրբեջանի հետախուզական ծառայությունների աշխատակիցը հանդիսացող, Սեյրան անունով ներկայացած անձի հետ եւ հավաքագրվել վերջինիս կողմից` տրամադրելով տեղեկություն ԼՂՀ Մարտունու շրջանում որպես հետախույզ ժամկետային զինծառայության ընթացքում տիրապետած տեղեկությունների վերաբերյալ: Վճարելով 750 ԱՄՆ դոլար գումար` վերոհիշյալ Սեյրանը տվել է առաջադրանք` ընդունվել պայմանագրային ծառայության Մատաղիսի զորամասերից մեկում եւ տեղեկություններ հայտնել այդ զորամասի մասին համացանցի «սկայպ» ծրագրի կամ «օդնոկլասնիկի» սոցիալական ցանցի միջոցով:
