Վերջին տարիներին Հայաստանում տոկոսադրույքները անշեղորեն նվազում են: Մայիսի 24-ին կայացած մամուլի ասուլիսի ժամանակ այս մասին հայտարարեց Կենտրոնական բանկի Ֆինանսական կայունության եւ զարգացման վարչության պետ Անդրանիկ Գրիգորյանը:

2015 թվականին դիտվել էր ավանդների տոկոսների աճ, հատկապես հայկական դրամով ավանդների դեպքում, սակայն 2016-ին նվազումը շարունակվել է՝ ի դեպ, ինչպես ավանդների, այնպես էլ վարկերի դեպքում:

2016 թվականին ֆինանսական գրեթե բոլոր գործիքների համար տոկոսադրույքները նվազել են առնվազն 1 տոկոսային կետով (100 բազային կետ), նշեց նա:

Սրան նպաստել է համակարգում ռիսկերի նվազումը: Այսպես՝ կապիտալի համարժեքության ցուցանիշը (CAR), որը բանկի կապիտալը եւ նրա ակտիվները (դրանց ռիսկերի աստիճանի շտկմամբ) համեմատում է միջինը ըստ Հայաստանի բանկային համակարգի, 2016 թվականին աճել է 3,8 տոկոսային կետով եւ հասել 20 տոկոսի՝ թույլատրելի 12 տոկոս նվազագույնի դեպքում:

Նվազել է նաեւ ոչ ստանդարտ (ըստ հուսալիության) վարկերի տոկոսը: 2016-ի հունվարին այն կազմել է 7,95 տոկոս, իսկ 2017-ի մարտին՝ արդեն 6,2 տոկոս: