ԱՄՆ նախագահ Դոնալդ Թրամփը պնդելու է, որ ՆԱՏՕ-ում ԱՄՆ-ի դաշնակիցները կատարեն պաշտպանական ծախսերի հարցում իրենց պարտավորությունները։ Այս մասին հայտնել է պետքարտուղար Ռեքս Թիլերսոնը, փոխանցում է Washington Examiner-ը։
«Ինչպես ասաց նախագահը, նա իրոք ուզում է, որ ՆԱՏՕ-ի անդամ պետությունները ակտիվանան ու ամբողջովին կատարեն ծախսերի բեռի բաշխման իրենց պարտավորությունները»,- լրագրողներին ասել է Թիլերսոնը Բրյուսելի ճանապարհին՝ Air Force One օդանավում։ «ՄԻնչեւ ՀՆԱ 2 տոկոս ծախսերի բարձրացումը առաջարկություն է, որի հետ բոլոր համաձայնել են։ Ես կարծում եմ, որ նախագահն այդ հարցում շատ կոշտ է լինելու։ Նա կարող է ասել «Տեսեք ԱՄՆ-ն ծախսում է 4 տոկոս։ Դուք պետք է համոզեք, որ ձեր ավանդն եք ներդնում անվտանգության ապահովման գործում»։ Ես կարծում եմ՝ դա է լինելու ՆԱՏՕ-ին նրա ուղերձի միջուկը»,- ասել է Թիլերսոնը։
«Մենք համարում ենք, որ ԻՊ-ի դեմ պայքարի կոալիցիային ՆԱՏՕ-ի միանալը կարեւոր քայլ է, որը նրանք կարող էին ձեռնարկել։ Նրանք դիտորդի դերում են, բայց ավելի ու ավելի շատ են ներքաշվում ԻՊ –ի դեմ պայքարում»,- հավելել է Թիլերսոնը։
Թիլերսոնի խոսքով, Թրամփը դեռ վերջնական որոշում չի կայացրել կլիմայի մասին փարիզյան համաձայնագրի ու Աֆղանստանում ամերիկյան կոնտինգենտի ավելացման հարցերում։