Մանչեսթերում ահաբեկչություն իրականացրած մահապարտի մասին նոր մանրամասներ են ի հայտ եկել: Պարզվել է, որ Մանչեսթերի բնակիչ Սալման Աբեդին, որին կասկածում են պայթյունն իրականացնելու մեջ, ծնունդով Լիբիայից է: Նա դեպքից մի քանի օր առաջ է վերադարձել հայրենիքից: Կասկածյալի ծնողները հիմա էլ Լիբիայում են բնակվում: Հիմա իրավապահները փորձում են պարզել՝ արդյո՞ք նա հատուկ պատրաստություն է անցել ջիհադականների ճամբարում: Դեռեւս հայտնի չէ նաեւ, ահաբեկիչը միայնա՞կ է գործել, թե՞ համախոհներ է ունեցել:
Իսկ մինչ իրավապահներն աշխատում են Մանչեսթերի ահաբեկչությունը բացահայտելու ուղղությամբ, Լոնդոնում Բուքինգեմյան պալատից ոչ հեռու դանակով զինված տղամարդ է ձերբակալվել: Բայց այս դեպքը չեն շտապում ահաբեկչություն որակել: Ամեն դեպքում, տեղական լրատվամիջոցները նշում են, որ տղամարդուն ձերբակալել են դեպքի վայր Եղիսաբեթ 2-րդ թագուհու ավտոմեքենայի մոտենալուց հաշված րոպեներ առաջ:
Մայիսի 22-ի երեկոյան «Մանչեսթեր Արենա»-ում իրականացված ահաբեկչության հետեւանքով 22 մարդ է զոհվել, այդ թվում՝ երեխաներ: Մի քանի տասնյակ տուժած կա, որոնցից 20-ի վիճակը ծայրահեղ ծանր է:
Աշխարհի տարբեր քաղաքներում տեսարժան վայրերը լուսավորվել են Մեծ Բրիտանիայի դրոշի գույներով՝ ի հիշատակ Մանչեսթերի ահաբեկչության զոհերի: Նախաձեռնությանը հետեւել են Արաբական Միացյալ էմիրություններում, Հյուսիսային Իռլանդիայում, Շվեյցարիայում, Իսրայելում, Գերմանիայում եւ այլուր: Իսկ Փարիզում մարել են Էյֆելյան աշտարակի լույսերը, Հռոմում՝ Կոլիզեումի:
Կարեն Կարապետյանը վաղը երկօրյա այցով Ռուսաստան կմեկնի: Վարչապետի գլխավորած պատվիրակությունը Կազանում մասնակցելու է Եվրասիական միջկառավարական խորհրդի եւ ԱՊՀ կառավարությունների ղեկավարների խորհրդի նիստերին։
Դոնալդ Թրամփի աշխատակազմը հրապարակել է 2018 ֆինանսական տարվա բյուջեի վերաբերյալ Կոնգրեսին ուղղված առաջարկները: Առաջարկվում է, մասնավորապես, 29 տոկոսով կրճատել ամերիկյան օգնության ընդհանուր ծավալը, 60 տոկոսով էլ՝ Եվրոպային եւ Եվրասիային օգնությունը: Հայաստանին տրամադրվող օգնությունն առաջարկվում է կրճատել 67%-ով՝ 20.4 մլն-ից հասցնելով 6.8 մլն դոլարի: Բյուջեի նախագիծը հաշվի է առնում նաեւ Հայաստանի ու Ադրբեջանի միջեւ ռազմական հարաբերակցությունը: Առաջարկվում է երկրներին 600 հազարական դոլար հատկացնել՝ ռազմական կրթության եւ ուսուցման ծրագրի համար: Ռազմական ֆինանսավորում չի նախատեսվում: Ի դեպ՝ առաջարկները ներառում են նաեւ 907-րդ բանաձեւը, որը սահմանափակում է օգնությունն Ադրբեջանին այնքան ժամանակ, քանի դեռ այդ երկիրը չի դադարեցրել Հայաստանի դեմ գործողությունները: Ադրբեջանին ֆինանսական օգնությունը կկրճատվի 90 տոկոսով եւ ընդհանուր առմամբ կկազմի 1 միլիոն դոլար:
ԱՄՆ նախագահ Դոնալդ Թրամփն առաջին արտասահմանյան ուղեւորության շրջանակում Իտալիայում է եղել: Այստեղ նույնպես Թրամփին ուղեկցել են կինը՝ Մելանյան, դուստրը՝ Իվանկան ու փեսան՝ Ջարեդ Քուշները: Վատիկանում Թրամփն ու Հռոմի Ֆրանցիսկոս Պապը 30 րոպե տեւողությամբ հանդիպման ժամանակ զրուցել են հիմնականում ահաբեկչության թեմայով: Տեղական լրատվամիջոցների փոխանցմամբ՝ Պապը Թրամփին սառն ընդունելության է արժանացրել: Հռոմի Պապը նաեւ կլիմայի փոփոխությունների թեմայով գրքեր է նվիրել Թրամփին՝ հավանաբար ակնարկելով այդ հարցում ԱՄՆ նախագահի դիրքորոշումը:
Մելանյա եւ Իվանկա Թրամփերը Կաթոլիկ եկեղեցու Հովվապետի հետ հանդիպմանը զուսպ հագուստով են ներկայացել՝ սեւ գլխաշորերով, որոնցից, սակայն, հրաժարվել էին մահմեդական Սաուդյան Արաբիայում: Ի դեպ՝ Մելանյա Թրամփն Իտալիայում նույնպես ամուսնուն անհարմար վիճակի մեջ է դրել. Հռոմի օդանավակայանում ինքնաթիռից իջնելիս Դոնալդ Թրամփը ձեռքը կնոջն է մեկնել, բայց Մելանյան անտեսել է այն ու սկսել սանրվածքը շտկել: Նույնը տեղի էր ունեցել նաեւ Իսրայելում:
Դոնալդ Թրամփն Իտալիայում նույնպես հանդիպումներն ավարտել է ու Բելգիա մեկնել: Բրյուսելում ԱՄՆ նախագահը մասնակցելու է ՆԱՏՕ-ի գագաթնաժողովին, հանդիպելու է Եվրամիության կառույցների ղեկավարների հետ:
Արտակարգ պատահարների մասին: Վարդենիսում անհայտ անձը կամ անձինք պայթեցրել են եկեղեցու հարեւանությամբ գտնվող տներից մեկի մոտ կայանված «BMW»-ն: Մեքենան պատկանում է Վարդենիսի 62-ամյա բնակիչ Հակոբ Սիմոնյանին: Բարեբախտաբար, զոհեր եւ վիրավորներ չկան: Պայթյունի հետեւանքով վնասվել է նաեւ Սիմոնյանի տունը: Քրեական գործ է հարուցվել, իրավապահները փորձում են պարզել հանցագործություն կատարած անձի ինքնությունը:
Երեւանում էլ մահվան ելքով վրաերթ է տեղի ունեցել: 41-ամյա Գարիկ Մուրադյանը Opel մակնիշի մեքենայով Կոմիտասի պողոտայում վրաերթի է ենթարկել 69-ամյա Հուսիկ Հարությունյանին: Վարորդը փախուստի չի դիմել: Ծայրահեղ ծանր վիճակում գտնվող տուժածը հիվանդանոցում մահացել է:
Դոլարի անկումը շարունակվում է, կտրուկ թուլացել է նաեւ եվրոն: Արդյունքում դոլարի փոխարժեքն այսօր կազմել է 482 դրամ, եվրոյինը՝ 538, ռուբլունը՝ 8 դրամ 55 լումա, ֆունտինը՝ 625 դրամ:
Մայիսի 25-ին հանրապետության հյուսիսային շրջաններում սպասվում է անձրեւ եւ ամպրոպ, առանձին վայրերում՝ կարկուտ: Օդի ջերմաստիճանն աստիճանաբար կբարձրանա: Երեւանում վաղը երեկոյան ամպրոպ է սպասվում, առանձին հատվածներում՝ կարճատեւ անձրեւ: Մայրաքաղաքում գիշերը կդիտվի +10+12, ցերեկը՝ +24+26 աստիճան տաքություն: