ՆԱՏՕ-ն որոշել է միանալ ԱՄՆ ղեկավարած միջազգային կոալիցիային, որը պայքարում է «Իսլամական պետություն» ջիհադական խմբավորման դեմ։ Այս մասին ասվում է ՆԱՏՕ-ի գալիք գագաթնաժողովի համար գործողությունների ծրագրում, որը դաշինքի անդամ երկրների դեսպանները հաստատել էին մայիսի 24-ին, հայտնում է DW –ը, վկայակոչելով լրատվամիջոցը։
ՆԱՏՕ-ն համաձայնել է ընդլայնել AWACS հետախուզական օդանավերի առաքելությունը, որոնք հիմա Թոււրքիայում գտնվող բազայից պարեկություն են իրականացնում Սիրիայի ու Իրաքի օդային տարածքում։ Այսուհետ AWACS-ը նաեւ ուղղորդելու են ԻՊ-ի դեմ կոալիցիայի օդանավերը բոլոր դեպքերում, բացառությամբ այն դեպքերի, երբ ծրագրված են ռմբակոծություններ։ Բրյուսելում համաձայնեցված գործողությունների ծրագիրը բացառում է ՆԱՏՕ-ի երկրների մասնակցությունը ջիհադականների հետ ուղիղ մարտական բախումներում։
Դիվանագետներից մեկի խոսքով, այդ ծրագիրը պաշտոնապես հաստատվելու է մայիսի 25-ին, Բրյուսելում ՆԱՏՕ-ի անդամ պետությունների ու կառավարությունների ղեկավարների կողմից։ Այդ գագաթնաժողովին մասնակցելու է ԱՄՆ նախագահ Դոնալդ Թրամփը, որը դաշինքից պահանջում է ավելի ակտիվ պայքար միջազգային ահաբեկչության դեմ։
ԻՊ-ի դեմ պայքարի միջազգային կոալիցիան ԱՄՆ-ն ստեղծել էր 2014-ին։ Դրա կազմում 68 երկրներ են, այդ թվում ՆԱՏՕ-ի բոլոր 28 երկրները։ Միաժամանակ ՆԱՏՕ-ն կոալիցիայի կազմում ընդգրկված չէ որպես միասնական դաշինք։ Դրա պատճառներից մեկն էլ արաբական մի շարք պետությունների առարկություններն են։