Մեծ Բրիտանիայի իշխանությունները Մանչեսթերի ենթադրյալ մահապարտ-ահաբեկիչ Սալման Աբեդիի տանը պայթուցիկների արտադրամաս են գտել: Այս մասին հաղորդում է ամերիկյան ABC News-ը՝ վկայակոչելով սեփական աղբյուրներին:
Ըստ ՌԻԱ Նովոստիի՝ իշխանություններն Աբեդիի տանն այնքան քիմիական նյութեր են գտել, որոնք բավարար կլինեին մի քանի պայթուցիկ պատրաստելու համար: Պաշտոնապես այս տեղեկությունը չի հաստատվել:
Աղբյուրի տվյալներով՝ Աբեդին ահաբեկչության վայր է հասել գնացքով: Պայթուցիկները, ամենայն հավանականությամբ, ուսապարկով է բերել:
Մանչեսթերում մայիսի 22-ին իրականացված ահաբեկչությունը 22 մարդու կյանք է խլել, որոնցից 12-ը երեխաներ են: 64 մարդ հիվանդանոցներում է, նրանցից 20-ի վիճակը ծայրահեղ ծանր է: Բացի այդ՝ 9 մարդ, հիմնականում՝ դեռահասներ, անհետ կորած է համարվում:
