Ադրբեջանը քաղաքական եւ ռազմական առումով տանուլ է տալիս: Այս մասին NEWS.am-ի թղթակցի հետ զրույցում հայտարարեց Հայաստանի պաշտպանության նախկին նախարար Վաղարշակ Հարությունյանը:
Նրա խոսքով՝ անցած տարվա ապրիլյան իրադարձությունների ժամանակ Բաքուն ցանկանում էր մեկ բանի հասնել՝ համանախագահներին ստիպել առաջարկել տարբերակ, որոնք տարածքների հանձնում են նախատեսում:
«Նրանք դրան հասնել չկարողացան: Հակառակը՝ հայկական կողմն առաջ քաշեց պայմաններ, համանախագահները դրանք ընդունեցին, եւ Վիեննայում ու Սանկտ Պետերբուրգում հարց առաջադրեցին, որպեսզի Ադրբեջանը համաձայնի հետաքննության մեխանիզմների սահմանմանը, որոնք կբացահայտեն, թե ով է խախտում հրադադարը: Այդ պատճառով Բաքուն հիմա փակուղու մեջ է. նրանից պահանջում են, իսկ նա չի ցանկանում կատարել այդ պայմանները, քանի որ այդպիսով պարզ կլինի, թե ով է խախտում հրադադարի ռեժիմը»,- ընդգծեց Հարությունյանը:
Անդրադառնալով ադրբեջանկան կողմից «Սպայկ» տեսակի կառավարվող հրթիռի կիրառմանը՝ նախկին նախարարն ասաց. «Կառավորվող հրթիռի կիրառման իմաստը նրանց ռազմավարության շրջանակում է, որը հետեւյալն է. վախի մթնոլորտ ստեղծել Հայաստանում եւ Արցախում, ինչը կազդի ղարաբաղյան հարցով ռազմաքաղաքական որոշման ընդունման վրա: Այսինքն՝ նրանք կարծում են, որ հրադադարի ռեժիմի պարբերական խախտումների միջոցով կհասնեն ղարաբաղյան խնդրի կարգավորման»: Ադրբեջանը, ունենալով ավելի շատ ռազմական եւ այլ ռեսուրսներ, պարտվել է պատերազմում եւ 25 տարի շարունակ չի կարողանում լուծել այդ հարցը:
Հիշեցնենք, որ Ադրբեջանի ԶՈՒ-ն մայիսի 15-ին եւ մայիսի 16-ի գիշերը շուրջ 55 անգամ խախտել էր հրադադարի ռեժիմը: Շփման գծի արեւելյան հատվածում հակառակորդը «Սպայկ» տեսակի կառավարվող հրթիռ էր կիրառել, ինչի հետեւանքով մասնակիորեն վնասվել էր ռազմական տեխնիկայի մեկ միավոր: ԵԱՀԿ Մինսկի խմբի համանախագահները մայիսի 18-ին հայտարարությամբ հանդես եկավ՝ առաջին անգամ նշելով, որ հրադադարը խախտել է ադրբեջանական կողմը: