Հայաստանի Փոստի ազգային օպերատոր «Հայփոստը» եւ «Հայֆիլմ» կինոստուդիան կմասնավորեցվեն: Այս մասին նշված է 2017-2020 թվականների մասնավորեցման ծրագրում, որը հավանության արժանացավ կառավարության մայիսի 25-ի նիստում: Կվաճառվի նաեւ կառավարության Ընդունելությունների տունը:
Պետգույքի կառավարման կոմիտեի պետ Արման Սահակյանը նշեց, որ սեփականաշնորհման են ներկայացված 47 պետական ընկերություններ, որից 23-ը՝ սեփականաշնորհման նախկին ծրագրով:
Մյուս խոշոր օբյեկտների թվում է «Հայավտոկայանը», Երեւանի ոսկերչական գործարանի պետական բաժնետոմսերի փաթեթը, Կուրորտաբանության եւ ֆիզիոթերապիայի գիտահետազոտական ինստիտուտը:
Ամենամեծ թվով օբյեկտներն առաջարկել է Առողջապահության նախարարությունը՝ Ֆանարջյանի անվան ուռուցքաբանության ազգային կենտրոն, Ռադիոիզոտոպների արտադրության կենտրոն եւ մի շարք փոքր հաստատություններ:
Այս ընկերությունների վաճառքից պետությունն ակնկալում է 35-36 մլրդ դրամ (74 մլն դոլար) ստանալ:
