Համաներմամբ այսօր՝ մայիսի 25-ին, ազատ արձակված ազատամարտիկ Վոլոդյա Ավետիսյանը մասնակցում է զանգվածային անկարգություններին մասնակցելու մեջ մեղադրվող Արարատ Խանդոյանի գործով դատական նիստին:
Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանում Վոլոդյա Ավետիսյանին դիմավորեցին ծափահարություններով: Դատարանը դահլիճից հեռացրեց ծափահարողներից մեկին:
Նշենք, որ այս ընթացքում մեղադրական ճառով հանդես էր գալիս դատախազը: Դատավորը 10 րոպե ընդմիջում հայտարարեց:
Ըստ մեղադրական եզրակացության՝ Արարատ Խանդոյանը 2016թ.հուլիսի 20-ին Երեւանում տեղի ունեցած հասարակական անվտանգությունը վտանգած բռնությամբ, ջարդելով, գույք ոչնչացնելով եւ վնասելով արտահայտված զանգվածային անկարգությունների ընթացքում բռնություն է գործադրել ոստիկանության աշխատակիցների նկատմամբ` ձեռքերով եւ ոտքերով հարվածներ է հասցրել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցներին, քաշքշել եւ փորձել է խլել ոստիկանության ծառայողի վահանը: