Համաշխարհային անվտանգություն ու կայունություն ապահովել չի հաջողվի, քանի դեռ Արեւելք-Արեւմուտք հարաբերություններում գործընկերության մթնոլորտ չի ստեղծվել։ Այս մասին հայտարարել է ՀԱՊԿ (Հավաքական Անվտանգության պայմանագրի կազմակերպություն) գլխավոր քարտուղար Յուրի Խաչատուրովը, հաղորդում է «ՏԱՍՍ»-ը։
«Անվիճելի է, որ ժամանակակից պայմաններում գոյություն ունեն ընդհանուր մարտահրավերներ ու անվտանգության սպառնալիքներ, որոնց հաղթահարելու կառուցողական փոխգործողությունը, նաեւ՝ համապատասխան միջազգային կազմակերպությունների հետ, գոյություն ունեցող աշխարհակարգն առավել կայուն ու անվտանգ կդարձներ։ ՀԱՊԿ-ն ձգտում է նման համագործակցություն ձեւավորել»,- ասել է Խաչատուրովը։
«Սակայն այդ հարցի շուրջ, մեր կարծիքով, պահպանվում են գլոբալ դիմակայության տարիներին մշակված հնացած կարծրատիպերը։ Ակնհայտ է, որ քանի դեռ չկա Արեւելք-Արեւմուտք հարաբերություններում գործընկերության մթնոլորտ, մեզ չի հաջողվի անվտանգություն ու կայունություն ապահովել աշխարհում»,- նշել է նա։
Նրա խոսքով՝ վերջին 2.5 տասնամյակում ՀԱՊԿ հայեցակարգը որոշակի էվոլուցիայի է ենթարկվել՝ աշխարհում գլոբալ առաջնորդության համար մրցակցության, ռեսուրսների համար պայքարի, զինված հակամարտությունների, լարվածության սրացման եւ միջազգային ահաբեկչական սպառնալիքի հետ կապված։
Խաչատուրովն ասել է, որ ՀԱՊԿ-ում հավաքական անվտանգության գործող համակարգ է ստեղծվել՝ հիմնված «երեք ոլորտներում միմյանց լրացնող հավաքական ջանքերի վրա՝ քաղաքական, ռազմական համագործակցություն եւ մարտահրավերներին ու սպառնալիքներին դիմակայելուն ուղղղված համագործակցություն»։