Ի՞նչ անել, եթե Ռուսաստանը հարձակվի։ Ըստ ՆԱՏՕ-ի Կանոնադրության 5-րդ հոդվածի՝ Գերմանիան ու նրա գործընկերները պետք է պաշտպանեն Արեւելյան Եվրոպայի երկրները։ Սակայն Գերմանիայի բնակիչների մեծ մասը, ըստ Pew Research Cente հեղինակավոր կենտրոնի անցկացրած հարցման, համաձայն չէ դրան, փոխանցում է Die Welt։
Հարցման մասնակիցների 53 տոկոսը դեմ է արտահայտվել ՆԱՏՕ-ի արեւելյան գործընկերներին՝ օրինակ Էստոնիային, Լեհաստանին կամ Լատվիային ռազմական օգնություն ցուցաբերելուն,եթե նրանց վրա հարձակվի Ռուսաստանը։
Ոչ մի այլ երկրում 5-րդ հոդվածի իրականացումն այդքան բացասական արձագանք չի առաջացրել։ Օրինակ Նիդեռլանդներում դեմ է արտահայտվել 23 տոկոսը, Լեհաստանում՝ 26, Կանադայում ու ԱՄՆ-ում՝ 31 տոկոսը։ Ֆրանսիայում ու Բրիտանիայում դեմ են արտահայտվել 43 տոկոսը, իսկ Իսպանիայում՝ 46։
Ընդ որում Գերմանիայի արեւելքում ռազմական օգնությունն աջակցում է մասնակիցների ընդամենը 29 տոկոսը, մինչդեռ Արեւմուտքում՝ 43 տոկոսը։
«Դաշնային կառավարությունը, սակայն, այլ քաղաքականություն է վարում։ Բեռլինը պատրաստ է հարձակման դեպքում առաջատար դեր ստանձնել ՆԱՏՕ-ի անդամների պաշտպանության գործում։ Լիտվայում տեղակայվել է բունդեսվերի գումարտակը, 450 զինծառայողներով ու տանկերով՝ Ռուսաստանին վախեցնելու ու երկիը պաշտպանելու համար»,- գրում է պարբերականը։
Ընդհանուր առմամբ, նշում է հեղինակը, անցած տարի Գերմանիայի բնակիչների շրջանում ՆԱՏՕ-ի նկատմամբ վերաբերմունքը բարելավվել է՝ գերմանացիների 67 տոկոսը դրական է վերաբերվում ՆԱՏՕ-ին, ինչը 12 տոկոսով շատ է 2015-ի ցուցանիշից։ ՆԱՏՕ-ին աջակցության ամենացածր մակարդակը Իսպանիայում է ՝ ընդամենը 45 տոկոս։
«Թրամփն իր նախընտրական քարոզչության ընթացքում հայտնել էր, որ Ռուսաստանի կողմից ագրեսիայի դեպքում ՆԱՏՕ-ին ԱՄՆ-ի աջակցությունը պայմանավորված է նրանով, արդյոք ՆԱՏՕ-ի երկրները պաշտպանական կարիքների համար կհատկացնեն ՀՆԱ 2 տոկոսի չափով վճարներ։ Այդ հայտարարությունները չեն մոռացվել։ Վստահությունը, որ ամերիկացիներն անհրաժեշտության դեպքում օգնության կգան, Եվրոպայում նվազել է, չնայած այն դեռ ուժեղ է որոշ երկրներում, օրինակ Իսպանիայում ԱՄՆ աջակցության հարցում վստահ է 70 տոկոսը, Գերմանիայում՝ 65 տոկոսը, Ֆրանսիայում՝ 60 տոկոսը, ասվում է հոդվածում։
