«Հյուսիս - հարավ ճանապարհային միջանցքի ներդրումային ծրագրի» Տրանշ 1` Երեւան-Արտաշատ ճանապարհահատվածի 8 կամուրջներին հարող հատվածներում երթեւեկությունն այսօրվանից երկկողմանի բաց է:
Մյուս շինարարական աշխատանքները, կամուրջների ասֆալտապատումն ու բարեկարգումը կշարունակվեն արդեն բաց երթեւեկության պայմաններում:
2016 թ. սեպտեմբերին մեկնարկած կամուրջների ու ուղեանցերի շինարարության հետեւանքով երթեկությունը տեղ-տեղ միակողմանի փակվել էր եւ կազմակերպվում էր շրջանցիկ ուղիով: Այսօրվանից վարորդներին պատճառված անհարմարությունները կավարտվեն:
Երեւան-Արտաշատ ճանապարհահատված կատարած վերջին այցի ընթացքում ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը հանձնարարել էր, շինարարներն էլ պարտավորվել էին մինչեւ մայիսի 25-ը բացել երկկողմանի երթեւեկը:
Վերջին երեք կամուրջների ճանապարհամերձ հատվածներից այսօր հեռացվեցին նախազգուշացնող նշանները, եւ երկկողմանի երթեկությունը վերականգնվեց:
«Տրանսպորտային ծրագրերի իրականացման կազմակերպություն» ՊՈԱԿ-ի տնօրեն Վարդան Կարապետյանը դիտարկեց նաեւ կատարվող աշխատանքների որակը, գործնական դիտողություններ արեց:
Ճանապարհաշինարարները հավաստիացրին, որ աշխատում են առավելագույն արագությամբ եւ պայմանագրով նախատեսված ժամկետներում՝ մինչեւ նոյեմբեր ամիսը, նոր ուղեանցերի կառուցման, գոյություն ունեցող ուղեանցերի վերակառուցման շինարարական աշխատանքներն ամբողջությամբ կավարտվեն։