Երեւանում ողբերգական դեպք է տեղի ունեցել: Դավիթաշենի կամրջից 13 տարեկան երեխա է ընկել ու մահացել: Նախնական տեղեկություններով՝ տղան ընկերների հետ կամրջի մոտ խաղալիս է եղել, այդ ընթացքում էլ տեղի է ունեցել ողբերգությունը: Տղայի ընկերը դեպքի վայրում իրավապահներին մանրամասներ է պատմել:

Հայաստանում մահափորձ է կանխվել: Իրավապահները տեղեկություն էին ստացել, որ մի խումբ զինված անձինք սպանություն են ծրագրում: Նրանք Էջմիածնում բնակարան էին վարձակալել, զենք ու զինամթերք ձեռք բերել ու սկսել նախապատրաստվել: Ոստիկանները, սակայն, անակնկալի են բերել կասկածյալներին: Երեք անձի Էջմիածնի բնակարանում վնասազերծել են ու բերման ենթարկել: Բնակարանի խուզարկությամբ էլ զենք ու զինամթերք է հայտնաբերվել:

Լրատվամիջոցների տեղեկություններով՝ նրանք մահափորձ էին ծրագրում երկու հեղինակությունների՝ Վստրեչի Ապեր մականվամբ հայտնի Արամ Վարդանյանի եւ Դոն Պիպո մականվամբ հայտնի իտալահայ Արթուր Ասատրյանի դեմ:

Գուգարքում ընտանեկան վեճի արդյունքում կինը սպանել է ամուսնուն: 32-ամյա Լիանան դեպքի վայր ժամանած ոստիկաններին է ներկայացրել «Մակարով» տեսակի ատրճանակը, որից կրակել է ամուսնու՝ Տիգրան Մարտիրոսյանի վրա: Հարեւաններն ասում են՝ տանից մշտապես վիճաբանության ձայներ են լսվել, իսկ այսօր նաեւ կրակոցներ են հնչել: 33-ամյա Մարտիրոսյանի սպանության փաստով քրեական գործ է հարուցվել:

Նշենք, որ Տիգրան Մարտիրոսյանը տարիներ առաջ սպանված քրեական հեղինակություն «Ճաճոյի Էդոյի» որդին է: Էդիկ Մարտիրոսյանը, նրա որդին` ժորա Մարտիրոսյանն ու ազգականը սպանվել էին 2004 թվականին: Վանաձորից դեպի Ալավերդի տանող ճանապարհին նրանց մեքենան գնդակոծել էին:

Վարչապետի պաշտոնում վերանշանակվելուց հետո Կարեն Կարապետյանի դրայվը կտրուկ ավելացել է: Երկու օր առաջ գործադիրը մայիսի 30-ին Ազգային ժողովի արտահերթ նիստ գումարելու առաջարկ էր արել, այսօրվա նիստում էլ որոշել է եւս մեկ արտահերթ հրավիրել հունիսի 8-ին: Խորհրդարանի հաստատմանն օրինագծերի չորս փաթեթ են ներկայացնելու:

Փողոցների մաքրությունը Կարեն Կարապետյանի համար, կարծես, պատվի խնդիր է դարձել. կառավարությունը հնարավոր բոլոր միջոցներով այս օրերին քարոզում է առաջիկա համապետական շաբաթօրյակն ու քաղաքացիներին կոչ անում միանալ դրան: Վարչապետի հերթական նախաձեռնությունը նույնպես սրան է վերաբերում: Կարապետյանը հանձնարարել է համայնքապետարանների կազմում նոր՝ սանիտարական տեսուչների հաստիքներ ստեղծել, որոնք պետք է տուգանեն աղբը չնախատեսված վայրում թափող քաղաքացիներին: Սա, հավաստում է, լրացուցիչ ծախս գրեթե չի առաջացնի: Նոր աշխատակիցների աշխատավարձերը կգոյանան հենց այդ տուգանքների հաշվին: Զբոսաշրջիկների համար Հայաստանը պետք է գրավիչ լինի նաեւ վերեւից: Վարչապետը հանձնարարել է միասնական ոճ եւ գույն հաղորդել շենքերի տանիքները:

Գործադիրի այսօրվա նիստում նաեւ նշանակում է արվել. Գեղարքունիքի մարզպետ է նշանակվել Կարեն Բոթոյանը: Մարզի նախկին ղեկավար Ռաֆիկ Գրիգորյանն ապրիլին կայացած ընտրությունների արդյունքներով խորհրդարան է վերադարձել:

Վերջին զանգին ընդառաջ՝ օրակարգային են դարձել կրթության ոլորտի խնդիրները: Լրագրողները Լեւոն Մկրտչյանին նախ հարցրել են վարչապետի նախաձեռնած դպրոցների օպտիմալացման հնարավոր հետեւանքների մասին: Մտավախություն կա, որ հատկապես հեռավոր գյուղերում դպրոցները փակելը կարող է նպաստել արտագաղթին: Մկրտչյանը վստահեցրել է, որ իրականում դպրոցների խոշորացումից աշակերտները միայն կշահեն. ծախսերը կկրճատվեն, ուսուցման մակարդակն էլ կբարձրանա:

Փոփոխություններ են սպասվում նաեւ բարձրագույն կրթության ոլորտում: Լեւոն Մկրտչյանին դուր չի գալիս, որ բակալավրիատի մասնագիտությունների 70%-ն այսօր հումանիտար ուղղություններով են: Տեխնիկական մասնագիտությունների ընդլայնման հաշվին դրանց թիվը կկրճատվի: Հնարավոր է նաեւ, որ առաջիկայում որոշ համալսարաններ նորից ինստիտուտներ դառնան:

Որքան էլ Կրթության նախարարությունը վստահեցնում է, որ Վերջին զանգի կապակցությամբ դրամահավաքն արգելվել է, ամեն դեպքում, բազմաթիվ ահազանգեր կան, որ դրամահավաքը շարունակվում է, որոշ դպրոցներում այն նույնիսկ մեծ ծավալների է հասնում: Նախարարի խոսքով՝ դա աշակերտների ցանկությունն է: Ուսուցիչներն ու աշակերտներն էլ իրենք պետք է տեղում հետեւեն, որ անվճարունակ շրջանավարտները խնդիր չունենան:

Ազատամարտիկ Վոլոդյա Ավետիսյանն այսօր վերջապես ազատ է արձակվել: Կալանավայրից նա դուրս է եկել վարդերը ձեռքին, որոնք անձամբ էր մշակել բանտում անցկացրած երեք տարիների ընթացքում: Ավետիսյանը ծաղիկները լրագրողներին է նվիրել:

Վոլոդյա Ավետիսյանին դիմավորելու էին գնացել մարտական ընկերները, հարազատները, վեց զավակները: Նա հայտարարել է, որ կալանավայրից անմիջապես գնալու է կառավարություն, որտեղ շուրջօրյա նստացույց է սկսելու՝ պահանջելով, որպեսզի Հայաստանում սկսի գործել վաղաժամկետ պայմանական ազատման ինստիտուտը: Նշենք, որ Ավետիսյանն ինքն էլ այդ ինստիտուտի չկայացած լինելու զոհն է. նրա փաստաբանները մի քանի անգամ ապարդյուն դատարան էին դիմել՝ խնդրելով վաղաժամկետ ազատում: Ի վերջո՝ ազատամարտիկն ազատ արձակվեց համաներման արդյունքում:

Հիշեցնենք, որ Վոլոդյան Ավետիսյանը մինչեւ վերջ չընդունեց իրեն առաջադրված կաշառքի մեղադրանքը: Նա պնդում էր, որ դա քաղաքական հաշվեհարդար է իր դեմ՝ ազատամարտիկների սոցիալական խնդիրների լուծման համար իր պայքարի պատճառով: Այնուամենայնիվ, նա մեղավոր ճանաչվեց եւ դատապարտվեց 6 տարի 6 ամիս ժամկետով ազատազրկման եւ այս գործում, նրա խոսքով, մեծ դեր ուներ պաշտպանության նախկին նախարար Սեյրան Օհանյանը, որը, ի դեպ, Ավետիսյանի մարտական ընկերն է:

Լրագրողները հետաքրքրվեցին, թե հիմա, երբ Օհանյանն իրեն ընդդիմադիր է հռչակել, հնարավո՞ր է, արդյոք, նրանք նորից համագործակցեն: Վոլոդյա Ավետիսյանը ոչինչ չի բացառում, այնուամենայնիվ, ակնարկում է, որ չի հավատում նախկին նախարարի քաղաքական նոր դիրքորոշման անկեղծությանը: Ավելի ուշ արդեն կառավարության շենքի առջեւ Վոլոդյա Ավետիսյանը հայտարարել է, որ չի դադարեցնելու իր քաղաքական պայքարը եւ իր համախոհների հետ փորձելու է դուրս բերել ժողովրդին վախի մթնոլորտից:

Անգլիական «Մանչեսթեր Յունայթեդը» տիտղոսների հավաքածուն համալրեց Եվրոպայի լիգայի հաղթողի կոչումով: Անգլիական ակումբը երեկ կայացած հանդիպման ժամանակ 2:0 հաշվով հաղթեց Ամստերդամի «Այաքսին»: Այս հաղթանակի շնորհիվ «Մանչեսթեր Յունայթեդը» Չեմպիոնների լիգայի խմբային փուլի ուղեգիր նվաճեց: Ստոքհոլմի «Ֆրենդս Արենա»-ում խաղից առաջ թիմերը մեկ րոպե լռությամբ հարգեցին «Մանչեսթեր Արենա»-ում մայիսի 22-ին իրականացված ահաբեկչության զոհերի հիշատակը: Ողբերգության պատճառով չկայացավ նաեւ եզրափակիչից առաջ նախատեսված շոուն:

«Այաքս»-«Մանչեսթեր Յունայթեդ» խաղի 18-րդ րոպեին հոլանդացիների դարպաս ուղարկած գնդակով հաշիվը բացեց ֆրանսիացի կիսապաշտպան Պոլ Պոգբան, 48-րդ րոպեին էլ Հենրիխ Մխիթարյանի գոլի օգնությամբ հաղթանակն ամրապնդվեց: Ի դեպ՝ Մխիթարյանը Հայաստանի հավաքականի առաջին ֆուտբոլիստն է, որը խաղաց եվրագավաթների մրցաշարի եզրափակիչում: Հայ ֆուտբոլիստը նաեւ 6 գոլով դարձավ «Մանչեսթեր Յունայթեդ»-ի լավագույն ռմբարկուն Եվրոպայի լիգայի այս մրցաշարում:  «Այաքս»-«Մանչեսթեր Յունայթեդ» խաղի լավագույն ֆուտբոլիստ ճանաչվեց իսպանացի կիսապաշտպան Անդեր Հերերան:

Մայիսի 25-ին նույնպես դոլարի փոխարժեքը շարունակել է նվազել: Արդյունքում դոլարի փոխարժեքն այսօր կազմել է 482 դրամ, եվրոյինը՝ 540, ռուբլունը՝ 8 դրամ 56 լումա, ֆունտինը՝ 624 դրամ:

Մայիսի 26-ին հանրապետության հյուսիսային շրջաններում սպասվում է անձրեւ եւ ամպրոպ, առանձին վայրերում՝ կարկուտ: Երեւանում վաղը երեկոյան ամպրոպ է սպասվում, առանձին հատվածներում՝ կարճատեւ անձրեւ: Մայրաքաղաքում գիշերը կդիտվի +11+13, ցերեկը՝ +24+26 աստիճան տաքություն: