Օպերայի համաշխարհային աստղ Մարիա Գուլեգինան ժամանել է Հայաստան՝ մասնակցելու «Ավրորա» մրցանակաբաշխությանը։ «Զվարթնոց» օդանավակայանում լրագրողների հետ զրույցում երգչուհին նշեց, որ սա շատ կարեւոր իրադարձություն է հայերի համար:
«Երբ իմացա «Ավրորա» մրցանակաբաշխության մասին, որը հիմնադրվեց Հայոց Ցեղասպանության 100-րդ տարելիցի կապակցությամբ, հասկացա, թե որքան ճիշտ, մարդկային բան է հիշել այն մարդկանց, ովքեր երբեւէ մեզ օգնել են, եւ օգնել են այն ժամանակ, երբ դա իսկապես անհնար է եղել։ Ես կարծում եմ, որ սա շատ կարեւոր է։ Աստված թող առողջություն տա այս նախաձեռնության հեղինակներին: Այս մրցանակաբաշխությունը շատ կարեւոր է հայերի համար, քանի որ հենց մենք ենք օգնության կարիք ունեցել»,-ասաց Գուլեգինան՝ չկարողանալով զսպել հուզմունքը։
Խոսելով Հայոց Ցեղասպանության եւ իր հայկական արմատների մասին՝ Գուլեգինան հուզվեց. «Հիմա կարտասվեմ»:
«Իմ նախնիները փախել են էրզրումից եւ հաստատվել Վրաստանում, բայց միեւնույն է՝ տանը միշտ հնչել է հայկական երաժշտություն, միշտ պատմվել են պատմություններ, մանկուց կարդացել են «Մուսա լեռան 40 օրը», «Վերք Հայաստանին». դրանցով եմ ես մեծացել։ Չնայած նրան, որ ես բազմազգ երեխա եմ, ինչ-որ հայկական բան իմ մեջ հաղթել է»,- ասաց Գուլեգինան: